Устазла хунерликлерин баямлайдыла

Бу кюнледе Нальчикни 33-чю номерли школуну мурдорунда «Россейде Жылны устазы-2022»  Битеуроссей конкурсну муниципал кесеги бардырылады. Ол кеси  да къонакъбай мектепде къууанчлы халда ачылгъанды. Аны хурметли къонакълары уа КъМР-ни Парламентини Билим бериу, илму эмда жаш тёлюню ишлери жаны бла комитетини председатели Нина Емузова, жарыкъландырыу, илму эмда жаш тёлюню ишлери жаны бла министр Анзор Езаов, Нальчик шахар округну жер-жерли администрациясыны башчысыны орунбасары Атмырзаланы Земфира, «Педагогланы профессионал усталыкъларын тохтаусуз ёсдюрген араны» директору Артур Кажаров эм бирсиле болгъандыла.

Къонакъла бир аууздан эришиуге къатышхан устазланы, аланы дерслеринде олтурлукъ сабийлени, жюрини келечилерин да конкурсну ачылыуу бла алгъышлагъандыла. Не тюрлю эришиу да - ол чыгъармачылыкъ жаны бла иш болгъанын эсгертгендиле.

Андан сора да, мектепни, школ жашауну сейирлигини, энчилигини юсюнден хапарлап, устазлыкъны жолун сайлап, артда анга кертичилей  къалгъанла бюгюнлюкде азыракъ болгъанларын да белгилегендиле. Мектепледе ишлеген педагогла сабийлеге дерс бергенден, аланы кеслерини предметлерини жашырынлыкъларына тюшюндюргенлеринден сора да, окъуучуланы жапсара, аланы жашауларында болгъан жетишимлеге къууана, кемчиликлерине жарсый билгенлерин да чертгендиле. Аллай хунерли адамла къатышхан эришиуню эсеплерин чыгъаргъан, аладан айырмалысын сайлаялгъан да жюриге тынч жумуш болуп къалмазлыгъын да.

Эсгерте кетейик, битеуроссей конкурсну сагъынылгъан уруму тёрели болумундан тышында «Нальчик шахар округда билим бериуню 2016-2022 жыллада айнытыу» деген муниципал программаны жашауда андан ары бардырыугъа жораланнганды. Аны бла бирге уа, белгилисича, устазла кеслерини профессионал хунерлерин ачыкълайдыла. Алай бла уа, бу усталыкъны даражасы ёсерине да себеплик болады.

Эришиуню жюрисине башчылыкъны Нальчикни администрациясыны билим бериу департаментини таматасыны къуллугъун толтургъан Валентина Сабанчиева этеди. Жюрини сопредседатели уа шахарны халкъгъа билим бериуде ишлегенлерини профсоюзларыны комитетини председатели Татьяны Вологировады.

Эришиу кеси да юч кесекге бёлюннгенди. Аны экинчи урумуна устазла бу кюнледе къатыша турадыла. Сёз ючюн, ала анда кеслери окъутхан предметледен 33-чю школну сабийлерине дерсле бередиле, класс сагъатла бла методикалы семинарла бардырадыла.

Биринчи кесеги уа заочно халда озгъанды. Жюри анда конкурсда билимлерин ачыкълагъанланы сайтларын къалай къурагъанларына къарагъанды. Болсада бюгюнлюкде ючюнчю урумгъа ким барлыгъы белгили тюйюлдю, нек дегенде аланы баллары алыкъа чыгъарылмагъандыла. Анда уа, ала мастер-классла берликдиле.

Бу жол конкурсха он устаз къатышады. Аланы араларында башха-башха предметледен окъутханла бардыла. Сёз ючюн, онжетинчи номерли мектепден Улбашланы Фарида - географиядан, жыйырманчы номерли школдан Малкъондуланы Лаура уа ингилиз тилден тюшюндюредиле. Эришиуде айырмалы болгъан устаз а аны республика даражалы урумуна къатышырыкъды.