Жангы ГЭС-ни къурулушу барады

Озгъан жыл кюз артында республикада энтта да бир гидроэлектростанцияны - Черек МГЭС-ни къурулушу башланнганыны юсюнден билдирген эдик. Бу объект Тёбен-Черек ГЭС-лени къауумуна киреди. Шёндю ала бары да 155,7 МВт электрокюч чыгъарадыла. Жангы объектге суу Зарагижде станциядан келликди. Ол кеси да бир жылгъа 87 миллион киловатт-сагъат берликди. Аны къурулушу 2024 жылны тёртюнчю кварталында бошаллыкъды, дегендиле КъМР-ни Промышленность, энергетика эм сатыу-алыу министерствосунда.

Станция деривация деген амал бла ишлерикди. Башхача айтханда, аны огъары жанында суу жыйылгъан тийреси боллукъ тюйюлдю. Зарагижде станциядан тазаланып чыкъгъан суу а ары биркилометрлик быргъы бла келликди.

Шёндю объект орналлыкъ жерге бийик вольтлу ток ыз тартылгъанды, алайгъа жол да ишленнгенди. Къурулушчула жашарча базаны эмда журтланы сюеп бошаргъа да кёп къалмагъанды. Битеу керек техника да жериндеди. Конкурс айырыуланы эсеплерине кёре, станциягъа гидротурбиналаны эмда генераторланы орнатырыкъ предприятияла да белгили болгъандыла. Ала бары да Россейдендиле.