«Элбрус районну участка больницасыны, анда ишлегенлени санын къысхартыуну юсюнден сёз бир заманда да бармагъанды»

  Коронавирусха къажау оператив штабны жыйылыуунда КъМР-ни Башчысы Казбек Коков Элбрус районда саулукъ сакълау системаны айнытыуну планларын туура этгенди.  Элбрус элде участка больницаны 520 квадрат метрни тутхан жангы мекямыны къурулушу быйыл окъуна башланырыгъын, анга 50 миллион сом да бёлюрге белгиленнгенин билдиргенди.

 Ол ангылатханыча, больницаны  шёндюгю мекямы (350 кв.м.) да жангыртыллыкъды. Стационар бёлюмюнде ундурукъланы саны 20-дан 70-ге дери ёсерикди.  Жайда уа учреждение аллергиялары къозгъалып къыйналгъанлагъа да болушурукъду.    

 Жангы мекямда уа травматология бёлюм орналлыкъды, анда туристлеге да болушлукъ тапдырыллыкъды.

 Республиканы Башчысы участка  больницаны, анда ишлегенлени санын къысхартыуну юсюнден сёз бир заманда да бармагъанын чертгенди. Жангыртыу ишле уа учреждение Элбрус районну ара район больницаны бёлюмю боллугъу бла байламлыдыла, деп ангылатханды. Ол тюрлениуле эки учрежденияны да кадрла,  ахча, ырысхы-техника кючлерин да бирикдирирге эмда аланы районну халкъына медицина болушлукъну игилендирирге онг берликдиле.

 Казбек Коков дагъыда Элбрус районну ара больницасыны баш врачына республиканы бек иги хирургларындан бири – КъМР-ни сыйлы врачы, бийик категориялы врач  Тилланы Хабибуллах салыннганын да билдиргенди.  Ара район больницагъа да жангы мекям къошуллугъун айтханды. РФ-ни Правительствосуна тийишли  тилек этилгенди, проект хазырланнганды, къурулуш барлыкъ жер да белгиленнгенди, деп къошханды.

- Элбрус районда саулукъ сакълау системаны айнытыугъа энчи эс бурулады,-деп чертгенди Казбек Коков.- Тюрлениуле жаланда хайыр келтирликдиле, ол санда медиклени иш хакъларына къошуллукъду, бек алгъа Элбрусда жашагъанланы, андан сора туристлени  медицина жумушла бла жалчытыу игилендирилликди.