«Сурат ишлерге бек сюеме»

Тырнауузда жашагъан Мурзаланы Сапаралийни къызы Камилагъа  бир жыл толгъанда, юйдегилери аны белгилерге жыйылып, гитче столчукъну юсюне  кёп тюрлю илляулани салгъан  эдиле. Аланы араларында уа карандаш, къалам да болгъандыла. Къызчыкъ тюзюнлей барып, карандашны, ызы бла уа къаламны да къолуна  алып, артха бурулгъанды. Юч жылында уа  аны  сабийле кечиннген Отарланы Керимни атын жюрютген 1-чи номерли лицейни  "Энчи  бала" деген ресурс арасына бередиле. Анда Камиланы саулугъуна да  кёз-къулакъ боладыла, сурат ишлерге  итиниуюн да эслеп, аны андан ары айнытыр амалла да этедиле.

Къызчыкъ а, башха тенглерича болмай, кюнню узунуна стол артындан къопмай,  тюрсюнлю  карандашла, бояула бла да бир затланы суратларын ишлеп турургъа хазыр эди. Кюнден кюннге, жылдан жылгъа къызны ол эниклеую тас болгъан угъай да, кюч ала барады. Арада болгъанында ол ишлеген суратла шахар, район конкурслада  кёргюзтюледиле, садда уа рамкалагъа салынып, къабыргъалада тагъыладыла. Ары балаларын алып келгенле аланы кёрюп, сейирсинмей къалмайдыла.

Камила бютюнда бек атланы суратларын ишлерге сюеди. Болсада ол шахарда жашагъан юйюн, гюллени, эгечини, тауланы, дагъыда кёп башха затланы  суратларын да къагъытда кёргюзтеди.

Бусагъатда Мурзаланы къызлары Тырнауузда 6-чы номерли мектепни 4-чю классыны окъуучусуду. Аны тенглери гинжиле бла  ойнагъанда, ол а  олтуруп, сурат ишлейди. Анасы: сен да тенг къызларынгча чыкъ да  арбазда, хауада  айлан, ойна, десе да, къыз унамайды. Бусагъатда ол ишлеген суратланы жюзге жууугъун санаргъа боллукъду. Аланы иги кесеги бек алгъа  сабий арада, ызы бла уа мектепде  шахар, район, республикалы конкурслада да  хорлап, дипломлагъа, грамоталагъа, саугъалагъа да тийишли болгъанды.

Камиланы Уллу Ата журт урушда Хорламны кюнюне жораланнган суратын а  республикада эм игиге санап, КъМР-ни жюз жыллыгъыны байрамына жарашдырылгъан сабийле ишлеген суратланы санына къошхандыла. Ол Москвада кёрмючде кёргюзтюллюкдю.

-Камила сурат ишлерге неден да бек сюеди. Аны бла бирге уа школда да бек иги окъуйду.  Ол ишлеген суратланы  биз мектепде, шахарда, районда  къуралгъан  тюрлю-тюрлю кёрмючлерибизде терк-терк  хайырланабыз. Аланы кёргенле бийик багъа бередиле, - дейди устазы Татьяна Николаевна Рюмина.

Бир жол а Камила ишлеген  суратланы республикада белгили художник эм скульптор Ахматланы Леуан кёргенди. Иги кесек къарай кетип: "Бу къызчыкъда фахму барды, аны айнытыргъа керекди",- деп таукел айтханды.

-Камила сагъатла бла олтуруп, сурат ишлеп турургъа боллукъду. Ол башхала кёрмегенни кёре биледи, - дейди  атасы, сурат ишлеуден биринчи  устазы да Мурзаланы Сапар-Алий. Ол кеси да заманында художестволу школну бошагъанды, сейирлик суратла да ишлеп тургъанды.

-Мен, школну бошасам, художниклени юйретген окъуу юйге кирликме. Бек сюеме сурат ишлерге. Ариу сурат этер ючюн а аны жашырынлыкъларына тюшюнюрге керекме, - дейди къызчыкъ.