Юйге, Кавказгъа!..

Къаллай бир къууанч барды суратдагъы адамланы бетлеринде. Кёп жылладан бери журтларына термилип тургъанла бюгюн юйлерине тебирегендиле. Къолларындагъы къызыл байракъла уа урунууда болдургъан ахшы жетишимлери ючюн берилгендиле.

Сурат 1957 жылда   16 апрельде Къыргъызстанда Кант станцияда алыннганды. Ол кюн алайлада жашагъан таулуланы къаууму Кавказгъа атланнганды. Ала бла бирге  кеталмай, ашырыргъа келген таулула да бардыла. Суратны да артдаракъ аладан бири Атталаны Хусей жибергенди Кючмезланы Шагъаманнга. Сакълагъан а Шагъаманны къызы Асият этгенди. Суратны редакциягъа уа Акъ-Суудан Солтанланы Магомет келтиргенди. 

Суратдагъыладан толу хапарны  Атталаны Хусей айтхан эди.  Ол билдиргеннге кёре, была барысы да Фрунзе тийресинде (шёндюгю Бишкек) Кант районда, Дмитриевка элде  тургъандыла.  Калинин атлы колхозда уруннгандыла. Анда жюз элли жети таулу юйюр жашагъанды.  Колхоз бек бай болгъанды. Кёп малла  да тутханды. Ууакъ  аякълыладан окъуна отуз мингден артыгъы бар эди. Жерчиликде уа асламысында бал туз чюгюндюр ёсдюргендиле. Таулула ары тюшгюнчю, бир гектардан юч жюз центнер ала эдиле. Бизникиле  келгенден сора уа, таулу къызладан энчи звенола, бригадала къуралгъандыла. Ары дери аллай иш бла кюрешмегенликге, ала ёмюрлерин чюгюндюр ёсдюрюп ётдюргенледен эсе эки кере кёп тирлик алгъандыла – гектардан 700-800 центнер. Атабийланы Любаны, Бабаланы Катяны, Жаболаны Соняны звенолары хар заманда да алчыланы санында айтылып тургъандыла.

Атабийланы Кажок, Атталаны Жамал, Бабаланы Мурадин алчы механизаторла эдиле.  Аладан сора да, кёп таулула, малчыла болуп, иги жетишимле кёргюзтгендиле. Биргелерине жашагъан малкъарлыланы, иш кёллюлюклерин, адамлыкъларын, ышаннгылы къоншула болгъанларын жаратып, дмитриевкачыла Кавказгъа къайтханланы жиляп ашыргъандыла. Аланы арасында колхозну председатели Бойко Вячеслав Анатольевич да болгъанды. Суратны ортасында кёкюрегинде ордени бла олтуруп тургъан олду. Аны сол жанындагъы уа юй бийчеси Вера Парфёнова эм дагъыда элни башха сыйлы адамлары. Къобузчу жаш да оруслуду. Ол а школда музыкадан окъутханды.

Поезд тюшден сора келирге керек эди, болсада адамла,  асыры ашыкъгъандан, эрттенликден окъуна вокзалгъа чыгъып, аны сакълап тургъандыла. Ол кюн журтларына къайтханланы санында Доттуланы Мухажир, Назир, Ибрахим, Хасан, Мырзаланы Ахмат, Алёш, Махийланы Мурат, Текуланы Хапаш, Ёзденланы Мустафа, Жолаланы Камал, Кючмезланы Шакъман, Созайланы Гадаш, Гиляхланы Исхакъ, Бачиланы Мухажир, Атталаны Рамазан эм дагъыда кёп башхала болгъандыла.

Бери келгенлеринден сора ол адамланы бир къаууму Кёнделеннге кетеди, жартылары Акъ-Суугъа. Жыйырма бла эки юйюр а Урваньны жаратып, ары кёчедиле: Атталаны Назир, Жамал, Масхут, Рамазан, Амин, Жаша, Атабийланы Кажок, Махатгерий, Созайланы Хорасан, Мишаланы Фаржан, Чопал, Адрах, Толгъурланы Леуан, Биттирланы Нафисат, Созайланы Хамбий, Кючмезланы Китау, Мухталим.

Артдан-артха дагъыда бери башха тау элледен кёп юйюрле кёчгендиле. Аланы асламысы тургъан орамгъа  Балкарская  деп аталгъанды.