Жолла мардалагъа келиширча

Быйыл «Къоркъуусуз эм тынгылы жолла» миллет проектге кёре, Элбрус районда жети километр чакълы бирде тёрт объектге тынгылы ремонт этилгенди.

Ол санда «Эльбрус» миллет паркда Шхелди бла Жантуугъан альплагерьлеге, спорт базалагъа элтген жолла мардалагъа келиширча болгъандыла. Ала водительден энчи сакълыкъ излеген къыйын участоклагъа саналадыла.   Ол себепден жолчула жангыртыу ишлени тамамлар ючюн аслам кюч къоратхандыла, болсада болжалдан кеч къалмай ишлерин толтуралгъандыла. 

 Огъары Басханда да фельдшер-акушер пункт, сабий сад, межгит орналгъан, социал магъаналы жол жангыртылгъанды. Элбрусда да 1.3 километрде   Мусука улу, Школ эм Бук орамлагъа къаралгъанды. Андан сора да, Тырныауузда мектепге бла маданият объектлеге баргъан Молодёжный орам жангы излемлеге келиширча этилгенди. Мында да подряд организация салыннган борчну графикгден кеч къалмай тамамлагъанды.  Ол санда жолну мурдорун кючлегенди, жангыдан асфальт жайгъанды, белгиле эм ызла да салгъанды.

Эсге сала айтсакъ, келир жылда да Элбрус районда туристле аслам хайырланнган «Прохладный-Элбрус – Нарзанла таласы» жол жангыртыллыкъды.