Жангылыкъла

«Ростелеком» Къабарты-Малкъарда берген Интернет связьны  хайырланыучуланы саны бу кюнледе 80 мингнге жетгенди. Аладан 60 процентине бу жумуш оптика ызла бла бериледи, дегендиле компанияда.

Къабарты-Малкъарда сабийлени школгъа дери билим бериу учреждениялада жерле бла жалчытырча аслам эс бурулады,  ол санда Чегем районда да.  Анга кёре  Мир, Шалушка эм Звёздный  элледе да  180 сабийге ясли блокла ишлене турадыла, деп билдириледи муниципалитетни администрациясыны  пресс-службасындан.

Кёп болмай Къабарты-Малкъарда Битеуроссей халкъ фронтну (ОНФ) келечилери жамауатны тилеги бла Нальчикде Дагъыстан орамда 41-чи номерли гимназияны къатында иеси эс бермеген,  атылгъан къурулушну тийресин тинтгендиле. Аны кезиуюнде мында мияладан, темирден эм башха материалладан  аслам къалгъан-къулгъан  жыйылгъанын, ол санда аслам хайыуан  мыллыкла болгъанларын да  тинтгендиле.    

Бизни республикада губула тири болгъан кезиу бошалгъанды деп айтыргъа боллукъду. Аны дагъыда бир игилиги – кърым геморрагия безгек бла быйыл бир адам да аурумагъанды. Шёндюледе губула къапхан сылтау бла медицина учреждениялагъа келгенлени саны иги да азайгъанды, деп айтылады Роспотребнадзорну КъМР-де Управлениясыны билдириуюнде.

Нальчикде «Къоркъуусуз эм тынгылы  автомобиль  жолла» миллет проектни чеклеринде жолланы къыстау жангыртадыла, деп билдириледи мэрияны пресс-службасындан.  

Озгъан айны ичинде Къабарты-Малкъар Республиканы 112-системасыны арасына гражданла кёп къалмай 23,3 минг кере сёлешгендиле. Аладан 3,3 минги болжалына салыргъа жарамагъан жумушлары бла, деп билдиргендиле республиканы Транспорт эмда жол мюлк министерствосундан.

Федерал кадастр палата жеринден тепдирилмеген мюлкню Бирикген къырал реестринден (ЕГРН) информацияны бериу сервис къурагъанды. Шёндюге дери андан жууап юч кюнню ичинде келиучю эсе, энди бу жумуш бир талай минутну ичинде тамамланырыкъды, деп билдиргендиле КъМР-ни Экономиканы айнытыу министерствосундан.

«Хорламны агъачы» деген Битеуроссей экология-патриот  акцияны чеклеринде Прохладна районда Дейское элде орта школну къатында бир ненча  эмен эмда кюйрюч терекчик орнатылгъанды.

Терк районда Опытное элде жашагъанланы таза суу бла жалчытыу умутланы чеклеринде жангы скважина ишлене турады.

Кёп болмай черек районда «Экология» миллет проектни чегинде бардырылгъан  «Таза суу» федерал  проектге кёре таза   суу баргъан быргъыланы жангыртып башлагъандыла, деп билдиредиле  муниципалитетни пресс-службасындан. Къашхатауда, Бабугентде, Бызынгыда эм Огъары Малкъарда да  суу ызланы тап халгъа келтирирге онг этиледи.