Республикада бола тургъан ишле

Министр Урванда бла Лескен районлада болгъанды

Кёп болмай КъМР-ни  саулукъ сакълау министри  Рустам Калибатов  Урван районда «Саулукъ сакълау» миллет проектге кёре,  ара поликлиникада  тынгылы ремонт ишле къалай баргъанлары бла шагъырейленнгенди.  

Бусагъатда мекямны ичинде ремонт этилип бошалгъанды. Ол санда терезелени, эшиклени, инженер коммуникацияланы алышхандыла эм сюртю-бояу ишлени да тамамлагъандыла.  Кабинетледен сора да, стацинарда онкологиялары болгъанлагъа болушурча  эм профилактика бардырырча амбулаторияла ишлерикдиле.

Биринчи этажда биринчи медицина  болушлукъ берген  кабинетле, травматология, хирургия,  ЭКГ, къан алгъан,  медпрофилактика, маммография,  флюорография эм  УЗИ-кабинетле боллукъдула. Экинчи къатында  терапевтле олтурлукъдула эм ючюнчюсюнде энчи бир ауруугъа къарагъан  специалистле орналлыкъдыла. Сагъынылгъан программаны чеклеринде медицина учреждениягъа  жангы  медицина оборудование -  цифралы рентген аппарат да алынырыкъды.  Адамлагъа тап болурча мекямгъа тёрт эшик бла кирилликди.  Аны бла бирге  специалистге электрон амал бла жазылырча онг да къураллыкъды.   

Министр тёгерек-башха къарагъандан сора, ишлеге бюсюрегенди, жаратмагъан шарты бла байламлы эсгертиуле да бергенди. Бар жумуш  да болжалдан кеч къалмай тамамларын да чертип  айтханды.

Графикге кёре, стационар быйыл жаз башында битерге керекди.

Андан сора да,  министр  Лескен районну ара поликлиникасында да болгъанды эм коллегалары бла приём бардыргъанды.  Аны биргесине  къан тамырлагъа бакъгъан хирург, профессор диагностика араны  баш врачы  Ахмед Асланов, УЗД- специалист Бачиланы Сакинат, штатда болмагъан  специалист-онколог  Беслан Балкаров, онколог-гинеколог Эльмира Гендугова да болгъандыла. Ол кюн приёмгъа  47 адам жазылгъанды. 

Рустам Калибатов айтханыча, быллай жолоучулукъла багъыу эм  диагностика ишни  тийишли халда тамамларгъа эм энчи медицина болушлукъ берирге себеплик тапдырадыла.  Министр кеси алты саусузгъа къарагъанды, аланы арасында биринчи келгенле эм учётда тургъанла да бар эдиле.  

Рустам Калибатов  поликлиниканы иши бла да шагъырейленнгенди -   медицина болушлукъ къалай берилгенине, цифралы  технологияланы хайырланыугъа,   электрон амал бла жазылыугъа эм башха амаллагъа  да эс бургъанды.  Жууукъ заманда ачыкъланнган  кемчиликлени  кетерирлерин да  буюргъанды.

Энди министр коллегалары  бла бирге  Черек районну ара больницасыны поликлиникасын да жокъларыкъды. 

Жангы излемлеге келишген  поликлиника

Былтыр «Саулукъ сакълау» миллет проектге кёре,  отуз жылны ичинде биринчи кере,  Нальчикни 3-чю номерли поликлиникасына тынгылы ремонт этилгенди.  

Энди медицина учреждение толусунлай жангы излемлеге келиширча эм  саусузлагъа тап болурча  жарашдырылгъанды.  Аны  биринчи къатында   фильтр-бокс, процедурала этген кабинет эм  аптека орналады. Экинчисинде врач-терапевтлени кабинетлери, тиширыулагъа  консультация этген бёлюм  барды. Ючюнчюсюнде да энчи бир ауруугъа къарагъан  специалистле олтурадыла.

Аны бла бирге  жангыртыу программаны чеклеринде поликлиникагъа   рентген комплекс, эксперт класслы эндоскопия оборудование эм эки  ЭКГ аппарат алыннганды.  Оборудованияны  жангы ачылгъан    диагностика бёлюмде салгъандыла.

Бюгюнлюкде  поликлиника бёлюмлери бирге элли минг адамгъа къарайды. План бла ол  сменагъа 755 адамгъа къарарчады. Кюндюз жатханлагъа да 64 жер барды. Быйыл поликлиниканы  Мёчю улу орамда  бёлюмюне да тынгылы ремонт этилликди.

Сабийлени саулукъларына – аслам эс

Быйыл РФ-ни Правительствосу  къагъанакъланы биринчи айларындан кеч къалмай скрининг этерча  программаны  бардырады. Аны магъанасы генетика бла байламлы  эм башха аурууланы кеч болгъунчу тинтиргеди. 

Къабарты-Малкъарда жашагъанла да  тестлени хакъсыз ётерге онг тапхандыла.  Алай бла быйыл жыл башланнганлы республикада 1573 адамгъа къаралгъанды. Сабий туугъандан сора биринчи беш кюнде къан алынады эм 36 ауруугъа анализ этиледи.  Аны магъанасы  аурууну башлана тургъан заманында тинтиргеди. Ол амал жетишимли  багъаргъа  себеплик береди.   Скрининг этилген сабийлени халлерине  специалистле къарайдыла эм багъадыла.