Сууларыны тазалыгъы кёзню къаматады

Тёрт жыл мындан алгъа Аттасауланы Ахматны жашы Тахирни башламчылыгъы бла «Къара-суу» деген табийгъат заказникни жеринде «Бабугент T» сатыу маркасы болгъан минерал буз сууну шешалагъа къуйгъан завод ачылгъанды. Сууну келген жери  Шимал Кавказны эм уллу чыранларындан бири Мижирги чырандан башланады, кеси да  жерни башына чыкъан шаудан болмагъанлай, суу къаяны ичинде табийгъат кеси этген ыз бла келеди.

 Биригиу бюгюнлюкде таза буз эм орта газы болгъан  сууланы пластмасс  шешалада чыгъарады. Чекленнген онглары болгъан «Таза суу» акционер общество эсепде Къабарты-Малкъар Республикада жюрюйдю. Биригиуню  баш борчу спирти болмагъан минерал эм башха сууланы   тюрлю-тюрлю шешалагъа къуюп чыгъарыуду. 

 Къабарты-Малкъар Республиканы Экспортха себеплик этген арасыны себеплиги бла биригиуге 2019 жылда Къытайда бардырылгъан «SIAL China2019» уллу кёрмючге къатышыргъа онг чакъгъанды. Анда этилген келишимге кёре, акционер общество «Бабугент» минерал буз сууну ол къыралны «MV Lack & Karosserie GmbH» фирмасы бла келишим этип, ары жиберип турургъа оноулашхандыла. Андан сора биригиу башда сагъынылгъан араны болушлугъу бла  Тегеранда  эм мюлк промышленностьну  аш-азыгъы, технологияла эм обрудование деген 26 халкъла аралы кёрмючге эм Санкт-Петербургда аш-азыкъ бла байламлы  29 халкъла  аралы уллу экономика   форумгъа къатышханды.

 Биригиу чыгъаргъан суусапла тенгизден 881 мерт бийикликде орналгъан Къабарты-Малкъар Республиканы Черек районуну шауданындан алынадыла. Ол Шимал Кавказны «Къара-суу» бийик тау заказнигинде орналыпды, деп билдиргенди Къабарты-Малкъар Республиканы Экспортха себеплик этген арасыны келечиси Оксана Хабачирова.

Бизни корр.
Поделиться: