Маданиятны айнытыугъа тийишли юлюш къоша

Бу кюнледе Москвада Россейни Правительствосуну финансла университетини жыйылыула бардырылыучу залында къууанчлы иш болгъанды. Ол  Дуния Артий къымылдауну  30-жыллыкъ юбилейине жораланнганды. Аны кезиуюнде халкъла аралы артий саугъалагъа:  «Алтын Пегас», «Лица года-2022», Махтаулукъну «Золотой глобус» деген кубогу, «Россейни халкъларыны  артиадасыны лауреаты», «Жюрегими  сабийлеге саугъа этеме» деген алтын белги, «Евразияны  культурасыны бла искусствосуну сыйлы ишчиси» деген атлагъа  тийишли болгъанла  белгиленнгендиле.

Саугъалауну кезиуюнде Къабарты-Малкъардан  «Псыгансу» эмда  Дагъыстанны сабий-жаш тёлю «Ватан»  фольклор тепсеу  ансамбльлеге  «Россейни сыйлы коллективлери» деген ат да аталгъаныны юсюнден да айтылгъанды.

Къууанчлы ингирни ача, Дуния Артий къымылдауну  вице-президенти, Евразиялы континентал  Артий къымылдауну президенти, профессор Ауес Бетуганов бу организация   битеу дунияда да профессионаллагъа, тюрлю-тюрлю  къауумлагъа,  маданиятха бла искусствогъа себеплик этген фондланы бирикдиргенин, алай бла  халкъла аралы даражагъа жетгенин чертгенди. «Аны алайлыгъына бу  къымылдаугъа  кирген  отуз беш къыралны келечилери уллу къыйын салгъандыла, тамамлагъан ишлери бла жамауатдан хурмет да тапхандыла»,-дегенди. 

Жыйылыуну  ахырында уа уллу концерт да болгъанды. Анга Россейни эмда Кавказны эстрадасыны, халкъ, опера жырланы эмда тепсеулени коллективлери къатышхандыла.

Ауес Бетуганов а  ёсюп келген тёлюню маданият хазналагъа табындырыугъа, халкъ чыгъармачылыкъны, миллет тёрелени эмда адетлени сакълаугъа  уллу къыйын салгъаны ючюн  Россей Федерацияны  Билим бериу эмда илму  министерствосуну  Битеуроссей чыгъармачы арасыны сыйлы белгисине да тийишли болгъанды.