Кеси ахчасына аскерчилеге дарманла алгъанды

Озгъан ыйыкъда социальный сетьледе Нальчик шахарны 14-чю гимназиясыны 6-чы классыны къуучусу Мухамед Моков кесини ахчасына Украинада бардырылгъан энчи операциягъа къатышхан россейли аскерчилеге медицина керекле алып жибергенини юсюнден информация кенг жайылгъанды. Жашчыкъны итиниулюгю ючюн КъМР-ни Башчысы Казбек Коков ыспас къагъыт да жибергенди. Аны Мухамедге Къабарты-Малкъарны жаш тёлюню ишлери жаны бла министри Азамат Люев келип саугъалагъанды.

Биз да Мухамед бла тюбеп, аны ол атламгъа не зат итиндиргенин соргъанбыз. Жашчыкъ билдиргеннге кёре, жойгъан ахчаны ол жангы велосипед алыргъа жыя эди.

- Школда аскерчилерибизге болушлукъгъа деп акция къурагъан эдиле. Анга биз барыбыз да сюйюп къатышханбыз. Письмола да жазгъанбыз. Мен эслегенден, тенглерим асламында аш-суу келтире эдиле. Сора юйге барып сагъыш эте кетгенимде, аскерчилеге биринчи болушлукъ этерча медицина керекле неден да магъаналы болгъанларына тюшюнюп, туугъан кюнюме берген ахчагъа алагъа аллай затла алыргъа мурат этеме. Анама айтханымда, ол да ыразы болады. Велосипедге келир жазгъа дери энтта да жыярма. Аскерчилерибизге болушханымдан а уллу зауукълукъ тапханма деп айталлыкъма, - дегенди Мухамед.

Нальчикчи жашчыкъны атламы кёплеге юлгюдю дерчады.