Басманы юсюнден законланы бузмаз ючюн

Роскомнадзорну КъМР-де Управлениясында республикалы эм район газетлени келечилерине окъутуу семинар бардырылгъанды. Журналистлени газетлени басмалагъанда, интернет сайтланы жарашдыргъанда тыш сыфатларын къалай жарашдырыргъа кереклисине юйретгендиле. Къаллай кемчиликле болуучуларын, ала ючюн жууаплылыкъны да ангылатхандыла.

Наркотиклени юслеринден жазгъанда, къаллай сёзлени сагъыныргъа жарамагъанын да билдиргендиле. «Уу къалай хазырланнганын,  аны къалай ичерге кереклисин, неда къайда сатылгъанын сагъынмагъыз. Быллай бузукъллукъ ючюн жууаплылыкъ къатыды. Наркотиклени юслеринден жазгъанда, ол келтирген хатаны ангылатыргъа, аны аманлыгъын ачыкъларгъа тийишлиди»,-деп белгилегендиле.

Андан сора да, терроризм эм экстремизм бла байламлы статьяланы къалай жазаргъа кереклисине да юйретгендиле. Докладчыла сюдню оноуу бла Россейде ишлерине чекле салыннган экстремист материалланы, террорчулукъ организацияланы юслеринден шартланы къайда табаргъа боллугъуна да юйретгендиле. Ол жаны бла тизмеле РФ-ни Юстиция министерствосуну бла ФСБ-ны энчи сайтларында басмаланыпдыла.  «Алагъа  кийирилген къауумланы сагъыннганда, «ишлерине Россейде чек салыннганды», деп къошаргъа керекди. Ансыз законнга бузукълукъ этилгеннге саналады,  тазирле уа бютюн уллудула  -миллион сомгъа дери»,-дегендиле.

 Семинар видеоконференция амал бла бардырылгъанды. Анга КъМР-ни, Ставрополь крайны эм Къарачай-Черкесни журналистлери да къатышхандыла.

Тикаланы Фатима.
Поделиться: