Байрамгъа - жангы социал объектле бла

Чегем район Къабарты-Малкъарны Къыраллыгъыны бла  Билимни кюнюне жангы социал объектлени ачылыуу бла тюберикди,- деп билдириледи муниципалитетни администрациясыны пресс-службасындан.

Социал магъаналы объектлени жангыртыргъа республиканы Башчысы  Казбек Коковну къайгъыргъаныны эм дайым болумну  контрольда тутханыны  хайырындан онг табылгъанды. 

Алай бла, биринчи сентябрьде  «Кавказ» Р-217 федерал  автомобиль трассада тынгылы ремонт этилгенден сора, Чегем сууну онг жанында  жангы мардалагъа келишген, жамауат эрттеден бери ашыгъып сакълагъан кёпюр  ачыллыкъды.  Андан сора да, Чегем шахарны ара орамында Бахсан шосседе жер тюбю бла баргъан переход  ишлеп башларыкъды. Объектни школгъа,  садикге, физкультура-саулукъгъа багъыу комплексге (ФОК),  шахарны огъартын жанына, Нальчикге баргъанла эм башхала да хайырланадыла.

Алгъадан  билдире тургъаныбызча, аны  атлауучлары эм ичи да тозурап адам кирирча тюйюл эди. Аны себепли келиширча   «Росавтодорну автомашина жоллагъа къарагъан «Кавказ» управлениясыны  специалистлери ол жангы мардалагъа тынгылы ремонт этгендиле.  Аны чеклеринде мурдорун кючлегендиле, суу ётмезча  гидроизоляция сюртгендиле, ич къабыргъаларын состар бла тышлагъандыла. Сакъатлагъа тынч болурча атлауучлада  поручняла салгъандыла. Саулауй алып айтханда,  тоннельни ичи эм тышы да    индустриал формагъа келишдирилип омакъ этилгенди.   Жууукъ заманда къоркъуусузлукъну ажалчытырча видеокамерала да  салынырыкъдыла.

Жангы окъуу жылны биринчи кюнюнде тынгылы  ремонтдан сора Тёбен Чегемни орта школу да окъуучулагъа эшиклерин керликди.  Мектепни чардагъыны агъачын, къанжалларын,  толусунлай инженер коммуникациясын, ток  чыбыкъларын, ёртенни билдирген сигнализациясын, терезелерин, эшиклерин эм башха затларын да алышхандыла.

Бюгюнлкде школну ичинде эм тышында да  тёгерек-башны жыйып, оборудованияны, эм мебельни да жарашдырып  кюрещедиле.

 Экинчи Чегемде да  Алакаев  бла  Выгонная орамлада саулай 3,8 километр чакълы бирде тынгылы ремон бардылгъанды.  Аны кезиуюнде жолну мурдорун кючлегендиле, асфальт салгъандыла, тротуарла, улоула тохтагъан комплексле  ишлегендиле эм тийишли  белгиле да салгъандыла. 

Чегемни ара майданында жангы фонтан да ачыллыкъды. Бусагъатда сууну тазалагъан эм  чачдыргъан  оборудованияны жерине салып  бошай турадыла. Ол да  шахарчыла солургъа сюйген жерледен бири боллугъу бямды.