КъМР-ни Башчысы Элбрус районда болгъанды, талай социал магъаналы объектледе халны да кёргенди

Билдиргенибизча, 5 августда  Тырныауузда Гирхождан суу бла ырхы  тюшгенди. Ары дери ырхы ыз тазаланнганыны хайырындан, ол уллу хата салмагъанды.  Бу кюнледе уа КъМР-ни Башчысы Казбек Коков Элбрус районнга барып,Тырныауузда  Гирхожан сууда ырхыны ётдюрген ыз не халда болгъанына къарагъанды, миллет проектлеге бла федерал программалагъа кирген къауум объектни да жокълагъанды. КъМР-ни Башчысы  дагъыда Элбрус районну администрациясыны таматасы Сотталаны Къурман бла муниципалитетни социал-экономика айныууну онгларыны юсюнден сёлешгенди.

Тырныауузда билим бериуню жангыча къурауну программасына кёре 1-чи номерли лицейни  окъутуу мекямы бла башланнган школу жангыртыла турадыла. Анда 700 чакълы сабий окъуйду. Башланнган школда ашхана кенгертилгенди, шёндю мекямны ичи эмда тышы сюртюле турадыла. КъМР-ни Башчысы физиканы, химияны бла биологияны кабинетлерин шёндюгю оборудование бла жалчытыугъа энчи эс бурулурун излегенди. Лицейни къатында майдан да тапландырыла турады. Анга «Шёндюгю шахар болумну къурау» федерал проектге кёре ахча бёлюннгенди. Казбек Коков  Гызы улуну бла Отар улуну орамларына ремонт къалай этилгенине къарагъанды. Аланы юслеринден анга анда жашагъанла билдирген эдиле, нек дегенде ол жолла социал объектлени къатларындадыла.

Кёнделенде  Доттуланы Ахматны атын жюрютген школда тынгылы ремонт барады. Бери жангы мебель, окъутууда керекли оборудование да келтирилгенди.  Андан сора да, быйыл «Хар сабийни жетишими» деген федерал проектге кёре Тырныауузда Совет Союзну Жигити В.Кузнецовну атын жюрютген 6-чы номерли школну эмда 5-чи номерли гимназияны спорт залларына ремонт этилип бошаллыкъды. Огъары Бахсанны бла Лашкутаны школларында «Точка роста» деген бёлюмле ачыллыкъдыла. Алада ишлерик устазла усталыкъларын ёсдюрюу курсладан ётгендиле.
«Культура» миллет проектге кёре Тырныауузда Краеведение музей  жангыртылгъанды. Ара библиотека да жангыртыла ттурады.Бусагъатда ары жангы мебель бла оборудование сала турадыла.

КъМР-ни Башчысы Тырныауузну тау-байыкъландырыучу комбинатыны къурулуш майданында да болгъанды, анга элтген жолну халин да кёргенди. Бюгюнлюкде  къурулуш эмда жол ишлени техниканы 75 тюрлюсю бардырады. Ишни 11 айны ичинде бошаргъа белгиленеди да, аны андан алгъа тамамларгъа да боллукъдула. Аны бла бирге промышленный объектни ток эмда газ бла жалчытыуну мадарлары этиледиле.

«Тырныауузда  вольфрам-молибден магъаданы чыгъарып башларча мадарла Россейни Президенти Владимир Путинни буйругъуна кёре этиледиле. РФ-ни Правительствосу къыралгъа бла бизни республикагъа  стратегия магъанасы болгъан бу проектни бардырыугъа хар жаны бла да себеплик этеди. Аны 2023 жылны ахырында – 2024 жылны башында ишлетип башларгъа умут этиледи. «Вольфрам  бла молибден – аз тюбеген къаты  металладыла. Аланы кесибизде чыгъарыу импортну алышындырыу борчну толтурууда уллу магъананы тутады. Регионда уллу помышленный производствону къурау а жангы ишчи жерле ачаргъа, республиканы бюджетини файдасын ёсдюрюрге да себеплик этерикди»,- дегенди республиканы оноучусу, комбинатны къурулуш майданында болгъандан сора.