Усталыгъы, адамлыгъы бла да айырмалыды

Иши, усталыгъы адамны халин, къылыгъын тюрлендиредиле, дейдиле. Борчлу  халда медицина страхованияны Къабарты-Малкъарда территориялы фондуну баш бухгалтер эсепни эмда  бирикген отчёт  этиуню  управлениясыны таматасы Къалабекланы Исхакъны къызы Фатимагъа къарасанг, ол оюм терс болгъанын ангылайса. Ариу ышарыуу бла ол адамны олсагъат кесине тартады.

Ол кеси уа, анычала кёп болгъанларына бизни ийнандырыргъа кюреше, былай айтады:

-Бизни бухгалтериябызда къаштюйле жокъдула. Бёлюмде  жыл санлары тюрлю-тюрлю болгъан адамла ишлегенликге, жарыкълыкъ кетмейди бизден. Алай  ишибизде уллу кёллюлюк этмейбиз. Тарихле бла ишлесенг, сюйсенг-сюймесенг да, битеу акъылынг алагъа кетеди. Жангылыргъа жарамайды. Болсада кюн сайын кёп  тарихлени санап турсанг, ахырында алагъа юйренип  къаласа. Ма  ол юйренчеклик  тюрлендире болур, баям, адамны халин, къылыгъын да.

Фатима кеси айтханнга кёре, ол бухгалтер боллукъма деп бирда  сунмай эди. Медицинадан бла экономикадан бирин сайлаялмай да кёп тургъанды. Энди уа эки усталыкъ бла да байламлы болгъанды.

-Медицина страхованияны  фондуна келгинчи, бир ненча жылны Госкомстатда экономист болуп ишлегенме. Анда кёзге къуру тарихле урунуп тургъанлыкъгъа, оюмларгъа да  онг бар эди. Мында уа жорукъладан бир кесек окъуна да бир жанына  таяргъа  чыртда  жарамайды,-дейди Фатима. -Госкомстатда ишленгенимде, аны  председателини ол замандагъы орунбасары Муталипова Александра Хаджимуридовнаны: «Къуру тарихлени кёрюп  къоймай, шартланы да кёре билирге керекди» дегени бир да эсимден кетмейди.

Фондда уа тарихле энчи магъананы тутадыла. Нек дегенде бухгалтер эсепни юсю бла барады битеу ахча республиканы  медицина  учрежденияларына. Аладан алыннган хар отчётда уа – къаллай бир адам  багъылгъаныны юсюнден шартла.

Фатимагъа дери бу бёлюмге Ольга Михайлдовна Дубровина башчылыкъ этип тургъанды.

-Аны орунбасары болуп ишлегенимде, бир затдан да къоркъмай, бек таукел  эдим,- дейди бизни ушакъ нёгерибиз. -Ольга Михайловна бир халатны ычхындыромаучу эди, кесини да жангылгъан адети жокъ эди. Мен  андан кёп затха юйреннгенме. Юйретирик адамынг бар эсе уа, ол бек аламатды. Ольга Михайловна юйретгенлени барысы да ишлерини усталары болгъандыла, аны ючюн анга бек ыразыдыла.

О.Дубровина республиканы Саулукъ сакълау министерствосуна кетгенинде барысы да бек жарсыгъандыла. Андан сора, сёзсюз,  бу къуллукъда ишлерге Фатимагъа къыйыныракъ  эди. Нек дегенде коллективде уллу даражасы жюрюген адамны алышындыргъан алай тынч  болмагъанды. Ахыр оноуну кесине этерге тюшген, магъаналы документлеге къол салгъан къаллай  жууаплы болгъанын ол бек терк ангылагъан эди.

Фатима бёлюмде тохташхан огъурлу халны, иш кёллюлюкню сакълаялгъанды, ишни тап къурар ючюн заманын, билимин, кючюн да аямагъанды.

Алгъын заманлада бухгалтерия бир жорукъла эм мардала бла ишлеген службагъа  саналгъанды. Бусагъатда алай тюйюлдю: налог эм бухгалтер эсепде къуруда тюрлениуле этилгенлей турадыла. Ала уа ишни бютюнда кёп эмда  къыйын этедиле. Насыпха, компьютерле бек ауур ишни кеслерине алгъандыла. Аласыз бир адам да жетишаллыкъ тюйюл эди.

-Счётлада санагъан кезиуню да сынаргъа  тюшгенди манга КъМКъУ-ну бошап, «Нальчиксельхозхимиягъа» тюшгенимде,-деп эсгереди Фатима –Госкомстатда уа уллу калькуляторла бла ишлегенбиз. Ала уа терк-терк «алдаучу» эдиле. Медицина страхованияны фондуну Нальчикдеги филиалында да бир жылны ичинде битеу документлени къол бла жазып чыгъыучу эдим.  Алайды да, тенглешдирирге онгум барды…

Бусагъатда Фондну специалистлери «Парус» деген компюютер программа бла ишлейдиле. Не айтдыраса, иш алгъындан эсе женгил болгъанды. Шартла терк тергелип  жарашдырылсала уа, аланы жангыдан тинтип чыгъар заман да къалады.

Биринчи заманлада  багъыу учреждениялада бухгалтерлени аллай  онглары болмагъанларына Фатима  бек жарсып тургъанды. Энди  аланы да  ишлери иги да женгилленннгенди. Фонд аланы аз-аз компьютер техника бла жалчытханды.

-Биз, финанс –экономика, юридический, информация бёлюмле, фондну районлада филиаллары бла уллу байламлыкъда ишлейбиз,-деп хапарлайды Фатима. –Ахырында битеу ишибизни хайыры бизни усталыгъыбызгъа, билимибизге кёре болгъанын да бек иги ангылайбыз. Арабызда тюйюш, уруш, даулаш да  болмайды, бир бирге ачыуланмай тамамларгъа кюрешебиз харкюнлюк ишлерибизни.

Жумушларын  алай бардырыуда уа Фатиманы  кесини усталыгъы, адамлыкъ шартлары да уллу  магъананы тутадыла. Контроль-ревизия бёлюм бла, эсе да аны таматасы Руслан Боготов бла ол къуру ишни угъай, жашауну да бошдан байламлы этген болмаз.

-Ол бизни ишибизни тинте келгенде танышханбыз,-дейди Фатима, ышара.

Андан сора уа кёп да бармай а тойларын этгендиле. Анга битеу колллектив келген эди.  Аланы коллегалары, шуёхлары, сейирлери да бирдиле. Бир жанындан, ол игиди. Башха жаны бла къарагъанда уа …  Юйде да ишни юсюнден хапарла бошалмайдыла.

Болсада аланы юйлери къонакъсыз да болмайды.

-Баш  иеми, мени да жууукъларыбыз, шуёхларыбыз кёпдюле. Биз къонакъ алыргъа бек сюебиз,- дейди Фатима.

Къалабекланы Исхакъны къызы Фатиматны иши эсленмей къалмагъанды.  Ол  КъМР-ни  биринчи Президентини  энчи  Указы бла Къабарты-Малкъар Республиканы Сыйлы грамотасы бла саугъаланнганды. Руслан бла ол сабийле да ёсдюредиле. Аланы , эки миллетни да адетлеринде  ариу къылыкълыла болургъа юйретедиле.