Студентлеге ишчи жерле къураллыкъдыла

РФ-ни экономиканы айнытыу министерствосу билдиргеннге кёре, 2030 жылгъа Шимал Кавказ федерал округда энчи орта билим берген учрежденияланы бошагъан студентлеге 45 минг жангы ишчи жер къураллыкъды. Аны юсюнден бу кюнледе РФ-ни Билим бериу министерствосу, СКФО-ну регионлары эм Кавказ.РФ биригиу да къатышып Ставропольда бардырылгъан стратегиялы сессияда РФ-ни Экономиканы айнытыу министерствосуну социал бёлюмню айнытыу департаментини таматасы Святослав Сорокин айтханды, деп билдиргендиле республиканы оноучусуну пресс-службасындан.

 «СКФО-да профессионал кадрланы хазырлау соруугъа бютюн да бек уллу эс бурургъа керекди. Бир жаны бла къарагъанда, округ терк айныгъан регионду, мында аслам халда инвестиция проектле тамамланыладыла, ала жашауда бардырылырча тийишли специалистлени креклиси да баямды. Болса да СКФО-ну Россейни бирси регионларындан башхалыгъы барды- мында иги кесек инвестициялы амалла кёпдюле, адам саны да ёсе барады, жаш тёлю энчи орта билим алыргъа итинеди. Биз этген тергеулеге кёре, 2030 жылгъа  СКФО-ну регионларында  он беш жылдан тебиреп, жыйырма жылгъа дери болгъан  жаш тёлюню саны битеу да 160 мингнге кёбейирикди. Ол шартны эсге алсакъ, бизге бек аздан энчи орта билим алгъанлагъа 45 минг жангы ишчи жерле къураргъа керекди», - дегенди Святослав Сорокин.  

РФ-ни Билим бериу министерствосунда да белгилегендиле шёндю энчи орта билим алгъанлагъа уллу эс бурулуп тургъанын.  «Школчуланы асламысы энчи орта билим алыргъа сюедиле. Иш бериучюле уа аллай усталыкълары болгъанланы излейдиле, аланы хар не бла да жалчытыргъа итинедиле, тийишли онгла къурайдыла.  Жаш тёлюге энчи орта билим бериу системагъа къайгъырыу-ол битеу бизни барыбызны да борчубузду эм жууаплылыгъыбызды. Энди биз жорукъланы, къаллай  борчла тургъанларыны юсюнден келиширге керекбиз. Жетишим болдурур ючюн, арымай-талмай къадалып ишлесек, кёрюмдюлерибиз боллукъдула», -дегенди РФ-ни билим бериу министерствосуну департаментини таматасы Виктор Неумывакин.

Шимал Осетияны-Аланияны, Ингушетияны,  Чеченни, Дагъыстанны,   Ставрополь крайны, Къабарты-Малкъар эм Къарачай-Черкес республикаланы  эм сейирлери болгъан башха организацияланы  келечилери ишчи къауумлы стратегиялы сессиялада кадрла бла байламлы сорууланы, инвестиция проектлени тийишли специалистле бла жалчытыуну эм башха сорууланы сюзгендиле.  Сессияланы кезиулеринде ары къатышханла СКФО-да энчи орта билим бериу учрежденияланы айнытыу программаларын белгилегендиле.  Регионла кёргюзтген оноула «профессионалитет» деген программаны мурдорун жарашдырыргъа онг берликди.