Ишини мурдору – кючлю билими

Таулу жашла бла къызла ата журтда, мындан узакъда окъусала, урунсала да, халкъларына махтау келтиргенлери бла къууандырадыла, ёхтем этедиле. Жанатайланы Альбертни уланы Инал да аллай жашладан бириди.

Ол Нальчикде алгъа жыйырма ючюнчю номерли школда окъугъанды. Артда, отуз экинчи номерли школ ачылгъанда, ары, роснефть класс ачылгъан эди да, анда энчи программа бла окъурча, шахар школладан иги билимлери болгъан жашланы бла къызланы жыйгъандыла. Инал да аланы санларында болгъаны сейир этерча тюйюлдю – ол кёл салып окъугъанды, не ишде да жууаплылыгъын унутмагъанды.

Школну бошагъандан сора Жанатайланы Инал кесини къагъытларын бир ненча бийик окъуу юйге жибергенди. Бек сейири уа – ол аланы барына да ётгенди. Сайларгъа тюшгенде уа, Москвада И.М. Сеченов атлы биринчи къырал медицина институтда окъургъа сюйгенди. Практикасы - иш хунерге юйрениую да И.М. Сеченов атлы больницада барып тургъанды. Айхай да, анда сынаулары болгъан кёп аламат врач ишлегени, аладан юлгю алыргъа онгу болгъаны да жарагъанды таулу жашха.

Ординатураны да Инал анда ётгенди. Бусагъатда уа врач-травматолог-ортопед усталыкъ бла Москва шахарны 23-чю номерли поликлиникасыны 5-чи номерли филиалында ишлейди. Ол биринчи педиатрия бёлюмде, дагъыда травматологияны бла ортопедияны болжалсыз болушлукъ бериу бёлюмюнде да багъады ауругъанланы. Ол ишлегенли алты жыл болады. Ол кёп да болмаз, былай къарагъанда, алай ариу сёзю, усталыгъын иги билгени, билимин кюнден-кюннге ёсдюре баргъаны бла жаш врач кесине сый да, намыс да алады.

Анда ишлегени бла чекленип къалмай, Инал бир ненча жылны ичинде Черкесск шахаргъа келип, анда ол бакъгъан ауруудан ауругъанлагъа консультацияла берип тургъанды.

Сыннганлагъа, чыкъгъанлагъа, башха сюек ауруулагъа къарагъан къыйын болгъанын къайсыбыз да билебиз. Аллай ауруулагъа алгъадан тюз диагноз салып, аланы тюз багъып башлау а бек жууаплы ишди. Интернетде берилген соруулагъа Инал къалай жууап бергени, сынаулары болгъан врачла окъуна аны айтханын тюзге санагъанлары Жанатай улун кесин угъай, бизни да къууандырады.

Бу къыйын усталыкъны Инал неден сайлагъан болур эди деген сорууума, аны ыннасы Къабарты-Малкъарны сыйлы устазы Жанатайланы Аслийжан былай жууап береди: «Гитче заманчыгъында велосипед бла авариягъа тюшген эди Инал. Ол кезиуде Нальчикде травпунктда бир аламат врач къарагъанды анга. Ючюнчю классда окъугъан Инал аны бла шуёх болгъан эди. Аныча болургъа итинип тургъанды артда. Аппасы Исмайыл ауругъанда, ол анга бек сакъ эди, сау кече къатында олтуруп чыкъгъан заманлары болгъанды. Аллай жюреги барды Иналны».

Инал бусагъатлада ортопедия жаны бла аспирантурагъа хазырлана турады.

Кёп болмай ол юйдегили болгъанды - жашауун Хапчаланы Борисни къызы Динара бла байлагъанды. Динара да врачды, онкологду. Жегутачы къыз Саратовда В.И. Разумовский атлы къырал медицина университетни бошагъанды. Ызы бла Дондагъы Ростовда Онкологияны миллет медицина тинтиу арасында билимин ёсдюргенди. Бир къауум заманны Москва тийресинде Реутов деген шахарны клиника больницасында онколог болуп ишлегенди.

Бусагъатда Инал да, Динара да бир жерде урунадыла. Таулу келин Москваны 23-чю номерли поликлиникасыны 5-чи номерли филиалында терапия бёлюмде багъады ауругъанлагъа.

Иналны къарындашы Роберт да таматасыны ызы бла барады. Ол да Москвада И.М. Сеченов атлы биринчи къырал медицина институтда окъуйду. Роберт стоматологияны сайлагъанды.

Жашла, шахарда ёсюп, малкъар тилни иги билгенлери кёплени сейир этдиреди. Аны бла къалмай, устаз ынналары бла белгили аппалары – жырчыбыз Жанатайланы Исмайыл туудукъларын – дуниясын эртте алышхан жашлары Альбертни сабийлерин – таулу адеп-къылыкъда ёсдюргендиле. Сау болсунла. Иги адам къайда болса да, андан халкъына ахшы хапар келеди.