Экономика

Былтыр Къабарты-Малкъарда жемишледен бла наныкъладан 517 минг тонна жыйылгъанды. Россейни Эл мюлк министерствосундан билдиргенлерича, къыралны мюлклерини барысында да жемишледен бла наныкъладан  3,6 миллион тонна тирлик аланнганды. Ол былтыр  бла тенглешдиргенде 2,2 процентге кёпдю.

«РосБизнесКонсалтинг» компанияны сайтында жазылгъанына кёре, пандемия бла байламлы банкла кредитлени алгъынча ёлчемде бермейдиле. 65 процентден аслам адам займны алалмагъандыла. Банклада кредит политиканы хар бёлюмде да бирча къатыландырмагъандыла. Эм аз ахча автокредитование жаны бла берилгенди: 2019 жылда 56,5 процент тилек къабыл кёрюлмеген эсе, былтыр а ол тарих 62 процентге жетгенди. Алай ипотекалагъа уа алгъа жылладан эсе кёбюрек ахча бёлюннгенди, аны юсюнден заявкаланы 71,3 проценти къабыл кёрюлгенди.

Федерал таможня  службаны Къабарты-Малкъарда бёлюмюнден билдиргенлерича, былтыр республиканы агропромышленный комплекси чыгъаргъан продукциядан 22 миллион долларгъа экспорт этилгенди.  Ол а  планда белгиленнген кёрюмдюден 13 процентге кёпдю. 

Озгъан жылда Къабарты-Малкъарда тюрлю-тюрлю  товарла бла жумушла ючюн картала бла 24,6 миллион сом чакълы тёленнгенди. Буруннгу жыл бла тенглешдиргенде ол эки кереге кёпдю. Быллай амалны  бюгюнлюкде жамауатны 43 проценти хайырланады эмда аны ёлчеми   16,7 миллиард сомгъа жетеди.  

Кёп болмай  Нальчикде Къабарты-Малкъарны электрокюч бла  къоркъуусузлугъун  жалчытыу  штабны кенгеши ётгенди.    Аны комиссияны башчысы, Правительствону  Председателини биринчи орунбасары  Муаед Кунижев бардыргъанды.

Жыл  башланнганлы  Къабарты-Малкъарда предприятияланы,  организацияланы эм энчи иелилени кючю бла  405,9 минг квадрат метрде    3784  фатар ишленнгенди. Ол былтыр бу заман бла тенглешдиргенде 44,4 минг квадрат метрге  неда 12,3 процентге кёпдю, деп билдиредиле  Кавказстатдан. 

РФ-ни Эл мюлк министерствосу бла регионлада власть органланы арасында келишимге кёре, производство бла байламлы къоранчланы бир кесегин къайтарырча ётмек эм булкала  биширген предприятиялагъа болушлукъ этилликди. Сёз ючюн,  бек  кёбюсю  беш кюн сакъларгъа жарагъан бир тонна продукциягъа- 2  минг сом.  Компенсацияны алгъан организация багъаланы да тохташдырыргъа тийишлиди.    

Бюгюнлюкде республиканы тюкенлеринде «Babugent» деген аты бла 1,5 литрлик  эмда 700 граммлыкъ шешалада гара сууну кёрюрге боллукъду. Ол кесин энчи этикетка бла танытады:  тауланы бетинде субай жугъутурну сураты бла. Шешаны юсюнде жазылгъаныча, суу  Шимал-Кавказ бийик-тау заказникде чыранладан къуюлады.  Кертисин айтханда, алыучуланы арасында анга сейир уллуду десек да жангыллыкъ тюйюлбюз. Танышларымы кёплери  бу сууну татыуун айтып, аны сайлагъанлары къууандырады.

Къабарты-Малкъарны Эл мюлк министерствосу эл мюлк жерлени суу бла жалчытыу (мелиорация) жумушланы тамамлаугъа субсидия къоллу болургъа сюйгенледен конкурсха къатышырча документлени алыу энтта да баргъанын эсге салады. Ведомствода айтханларыча, ахча «Къабарты-Малкъар Республикада мелиорация комплексни айнытыу» программаны чеклеринде берилликди.

Черек районда «Экопродукт 07» жалчытыу-сатыу кооператив мал сойгъан комплекс ишлене турады. Муниципалитетни администрациясындан билдиргенлерича, бу организация былтыр КъМР-ни Эл мюлк министерствосу бардыргъан конкурсха къатышханды.