«Къыралны айныуунда магъаналы сорууланы сюзюуню ачыкълыгъын жалчытады»

КъМР-ни Парламентини башчысы Татьяна Егорова видеоконференция амал бла РФ-ни Къырал Думасыны жыйылыууна къатышханды. Анда РФ-ни Правительствосу жылны ичинде тамамлагъан ишини эсеплери сюзюлгендиле.

Премьер-министр Михаил Мишустин былтыр толтурулгъан жумушланы юслеринден айтханды эмда битеу фракцияланы депутатларыны сорууларына жууапла бергенди. 

 Къырал Думаны башчысы Вячеслав Володин жыйылыу тюзюнлей эфирде кёргюзтюлгенин, анга регионланы законла чыгъарыучу органларыны оноучулары къатышханларын билдиргенди. Ол быллай амал къыралны айныуунда магъаналы сорууланы сюзюуню ачыкълыгъын жалчытханын, регионла бла байламлыкъланы кючлегенин, законла чыгъарыу ишни хайырлылыгъын ёсдюрюрге себеплик этгенин чертгенди.

   Михаил Мишустин санцияланы кезиуюнде тамамланнган жумушланы, энчи аскер операциягъа къатышханлагъа къырал болушлукъну, миллет проектлени жашауда бардырыуну, билим бериуню, культураны айнытыуну, саулукъ сакълауну болумун игилендириуню юслеринден айтханды.

 - Къырал Дума субъектле бла байламлыкъланы кючлеуню жангы амалларын хайырланады. Тюнене Думаны башчысы бла тюзюнлей эфирде ушакъ бардырылгъанды. Бюгюн а Правительствону отчётуна тынгылагъанбыз. Бу жумушла Къырал Думаны бла регионлада законла чыгъарыучу органланы араларында хайырлы байламлыкъланы жалчытыугъа себеплик этеригине ишексизме. Бизге былай мадарла артыкъда магъаналыдыла. Алай бла Правительство жылны ичинде тамамлагъан ишлени юслеринден толу шартланы билгенбиз, аны бла бирге уа докладны сюзюуню кёргенбиз.

 2022 жыл Россейни тарыхында къыйын кезиуледен бири болгъанды. Бизни къыралыбыз санкциялагъа тюшгенди. Алай, запад къыралланы къадалыуларына къарамай, социал-экономика ышаннгылылыкъ жалчытылыннганды, аны бла бирге миллет муратлагъа бла борчлагъа тийишлиликде айнытыу жумушла толтуруладыла, - деп белгилегенди   Татьяна Егорова.