Республиканы жюзжыллыгъын аталгъан байрам жумушла

Россейни эмда Европаны эм бийик тёппесине бир кезиуге аслам халкъ чыгъаргъа умутлуду: КъМР-ни 100 жыллыгъына аталгъан Эльбрусиада-2022 бу кюнледе ётерикди. Минги-Таугъа Москвадан, Санкт-Петербургдан, Нальчикден, Иркутскдан, Краснодардан эмда талай башха шахарладан жюз чакълы бир альпинист ёрлерикдиле. Ала эки къауумгъа бёлюнюп чыгъарыкъдыла ары. Шёндю къонакъла акклиматизацияны ётедиле, жолгъа уа 19 августда тебирерикдиле.

Саулай айтханда, бу байрамны чеклеринде эм азындан жыйырмадан артыкъ уллу фестиваль, кёрмюч, концерт, жыйылыу бардырыллыкъды. Бу кюнледе «Шуёхлукъну эстафетасы» деген республикалы миллет чыгъармачылыкъ фестиваль башланнганды. Аны чеклеринде Жашил театрда «Балкария», «Кабардинка», «Терские казаки» тепсеу ансамбльлени уллу концерти ётгенди. Анга кёпле, ол санда тышындан келген къонакъла да сюйюп къарагъандыла.

Бу кюнледе дагъыда Отарланы Омарны эмда Зарамук Кардангушевни атлары бла буруннгулу таулу эмда адыг жырланы «Мени ата журтум – мени жырым» деген сабий фестивальлары боллукъду. Экиси да Нальчикде ётерикдиле.

20 августда архитекторланы Юйюнде архитектура проектлени кёрмючю бардырыллыкъды. 22 августда уа, Россей Федерацияны къырал байрагъыны Кюнюне атап, Келишиулюкню майданында эмда Нальчикге Чегем районну жанындан кирген жерде тургъан стеланы аллында Россей Федерацияны бла Къабарты-Малкъарны байракъларын къууанчлы халда кётюрлюкдюле.

Бу айны ахыр кюнлеринде «Къабарты-Малкъарны 100-жыллыгъы. Документле эм материалла» деген суратлау кёрмюч ишин башларыкъды. 11 сентябрьге дери, кеси да юч кюнню ичинде, Нальчикни тапландырылгъан тийрелеринде «Нальчик – мени сюйген шахарым» деген жаш тёлю арт-фестиваль ётерикди.

Байрам жумушланы аслам кесегини кюню – 10 сентябрьди. Къабарты орамны жангыртылгъан кесеги ачыллыкъды, Уллу Ата журт урушну кезиуюнде жанларын берген нальчикчилени эсгертмесине гюлле салыу боллукъду. Нальчикде шахар паркны ара аллеясында «Къабарты-Малкъар бюгюн» деген промышленность - эл мюлк кёрмюч ишин башларыкъды. Абхазия майданда уа «Миллет тюрсюнле «КъМР-ге 100 жыл» деген миллет культураланы байрамы кесини къараучуларын сакъларыкъды. Анда уа муниципалитетле къурап миллет арбазла, чыгъармачылыкъ къауумланы жырлары бла тепсеулери да.

Ол кюн дагъыда жамауатны къууанчлы жыйылыуу Правительствону юйюнде ётерикди, 400-жыллыкъны майданында уа «Битеу барыбызны да юйю – мени Республикам!» деген республиканы миллет культура араларыны кёрмючю ачыллыкъды. «Жюзжыллыкъны тёппесинде» деген концертге къулакъ салыргъа сейирлери болгъанлагъа Музыка театр эшиклерин ачарыкъды. Ингирде уа Келишиулюкню майданында «Жарыкъны тёгереги» башланырыкъды. Ол кюнню байрам программасы кече сагъат онда ол майданда, Искож бла Стрелка микрорайонлада эмда «Сосруко» ресторанны аллында салютла бла бошаллыкъды.

Алай хар не да аны бла тохтап къаллыкъ тюйюлдю. Экинчи кюн (11 сентябрьде) республикалы ипподромда атла чабышыу боллукъду, 14-17 сентябрьде уа жаш тёлюню Шимал-Кавказда фестивалы ётерикди.

Москвада да 18-20 сентябрьде Къабарты-Малкъарны культурасыны кюнлери ётерикдиле. Кремльни дворецини сахнасында уа 21 сентябрьде уллу концерт бардырыллыкъды. Ары Къабарты-Малкъарны, Къарачай-Черкес эмда Адыгея республикаланы чыгъармачылыкъ коллективлери чыгъарыкъдыла.