Украинлыла Днепр сууда кёпюрню атдыргъандыла

Украинаны Сауутланнган кючлери Херсон областьда Днепрде кёпюрню атдыргъандыла, аны хатасындан россейли аскерчилени жалчытыу тохтарыкъды эм энчи операция да тыйыллыкъды, деп билдиредиле украинлы асламлы информация органла. Аны юсюнден войнасфейками.рф телеграм-канал жазады.

 Ишни болушу уа былайды, кёпюр толусунлай оюлмагъанды, аны юсюнден кёп жерледе басмаланнган суратла бла видеола шагъатлыкъ этедиле. Жер-жерли администрация билдиргеннге кёре, кёпюрню юсю бла жюрюген жерини бир кесеги бузулгъанды, аны хатасындан автомашиналаны жюрюулери тохтап турады. Шёндю кёпюрню оюлгъан жерлерин ачыкълай эм жамай турадыла.

Антонов кёпюрню бузулгъаны энчи аскер операцияны тохтатырыкъды, нек дегенде, аны юсю бла аскер техника эм гуманитар болушлукъ этиледи деген хапарла да толусунлай ётюрюкдюле. Керек болса, Россейни Сауутланнган кючлери Днепр сууну юсю бла понтон кёпюр этерикдиле, ол санда, темир жолну салып, поезд  чырмаусуз жюрюрча. Аны юсю бла адамланы, техниканы, тюрлю-тюрлю жюклени да ётдюрюрге боллукъду. Россейли специалистле  энчи аскер операция башланнганлы иги сынау жыйгъандыла, Украинаны аскерчилери артха кетген кезиулеринде кёпюрлени атдырып тургъандыла.

Белгилерча бир шарт, украинлы телеграм-каналла «Антонов кёпюр» оюлгъанды деген билдириулерине шагъатлыкъгъа 2014 жылда Мариупольда атдырылгъан кёпюрню суратын кёргюзтюп тургъандыла.