Хар жаны бла юлгюлю

Ата-анагъа сабийлери жашауда тюз жол сайлагъанларындан, къыралларына, миллетлерине жарагъан адамла болуп ёсгенлеринден уллу насып болмаз. Нальчик шахарда жашагъан  Эдикаланы Аскерни бла Асиятны аны бла насыплары тутханды. Жашлары Марат къуллукъ этген аскер бёлюмден аланы атлары бла ыспас, бюсюреу къагъыт келгенди. Анда былай  айтылады: «Хурметли Аскер Мухадинович бла Асият Борисовна! Жашыгъыз Чита шахарда РФ-ни аскер-хауа кючлерини автомобиль взводуну къауумуну санында къуллугъун бет жарыкълы бардырады. Аскер борчун биринчи кюнден окъуна намыслы толтура, къысха заманны ичинде «чынтты аскерчи» деген атха тийишли болгъанды.

Марат мында къуллукъ этген жерлешлери бла тауча, къабартыча да бирча уста сёлешеди, ингилизча да биледи. Жашны тёгерегине кёпле жыйыладыла. Ол а, миллетлени, динлени айырмай, хар ким бла да къарындаш шуёхлукъ жюрютеди.

Ма аллай жашладыла къыралыбызны келир заманы ырахатлы, мамырлы боллугъуна ышандыргъанла. Эдикаланы Маратча юлгюлю жаш ёсдюргенигиз ючюн жюрек ыразылыгъымы билдиреме. Подполковник Владимир Жадяев».

Марат Адиюхда жашайды. Гитче заманында окъуна анасына таянчакълыкъ этгенди. Тауукъ ферма къатларындады да, экинчи классха жюрюген жашчыкъ, эрттенликде эртте туруп,  тенглери бла ары барып ишлегенди. Ана къарындашы аны машина жюрютюрге, бузулгъан жерлерин тюзетирге да эртте юйретген эди. Узун бойлу, сёзюн сатмай бермеген, кишиге ауурлугъун жетдирирге сюймеген Маратны частьны командири кесине водитель этип алгъаны да бошдан болмаз. Машинаны сюйген жаш, аны не заманда да тизгинли, таза тутады, жорукълагъа бузукълукъ этмезге сакъды.

Марат аскерде спорт бла кюрешгенин да къоймагъанды. Аскер бёлюмню намысын къоруулай, Читада, андан тышында да эркин тутушуудан кёп тюрлю эришиулеге къатышады, саугъалары да бардыла.

Ол колледжни бошамай кетген эди аскерге. Къайтхандан сора, окъууун андан ары бардырыргъа, аны бла да чекленип къалмай, бийик билим алыргъа мурат этеди. Анга жетеригине да ийнанама. Нек дегенде ол мёхеллик этгенледен тюйюлдю, алгъа таукел къарагъан жашды.

Марат къуллугъун бошап къайтыргъа кёп къалмагъанды. Юйде аны анасы, атасы, эки эгечи да сакълайдыла. Ыннасы уа аны кёрюрге барысындан да бек ашыгъады.