Коронавирусдан ауругъанлагъа хакъсыз дарманлагъа – 27 миллион сом

Коронавирус инфекциядан ауругъанланы хакъсыз дарманла бла жалчытыугъа регионлагъа 5,1 миллиард сомдан артыкъ жиберилликди. Къабарты-Малкъар ол жумушха 27 миллион сомдан аслам аллыкъды. Аны юсюнден тийишли буйрукъгъа РФ-ни Правительствосуну Председатели Михаил Мишустин къол салгъанды.

Ахчаны Правительствону къыстырыкъ фондундан бёлюрге белгиленеди. Ол 1,5 миллиондан артыкъ адамны керекли препаратла бла жалчытыргъа онг берликди. «Сёз медицина болушлукъну  амбулаториялада алгъан, башхача айтханда, кеслерине юйлеринде бакъдыргъан саусузланы юслеринден барады. Аурууну оздурмаз ючюн эмда ол тереннге кетмез ючюн аланы кёп тюрлю амалла бла багъадыла. Керекли дарманла уа врачны жазгъаны бла хакъсыз бериледиле», деп айтылады документге къошулгъан ангылатыуда.

Премьер-министр къыралда эпидемиология болум къыйынлай къалгъанын айырып айтханды. Кюн сайын 20 мингден аслам саусуз къошулады, госпитальлагъа тюшгенлени саны да ёседи. Ауругъанланы кёбюсю уа кеслерине юйлеринде врачны болушлугъу бла бакъдырадыла.