Къышха хазырдыла

Къабарты-Малкъарны электрокюч бла жалчытыуну къоркъуусузлугъу жаны бла шабыны кенгешин республиканы промышленность, энергетика эм сатыу-алыу министри Шамиль Ахубеков бардыргъанды. Анга регионда энергетика субъектлени келечилери да къатышхандыла, деп билдиргендиле министерстводан.

Кенгешде инфраструктура келир къышха къалай хазырланнганыны, юсюнден баргъанды  ремонт ишлени  эсеплери чыгъарылгъандыла. Сора материалладан, техникадан, оборудованиядан эмда автотранспортдан неллай бир къыстырыкъ этилгени  билдирилгенди. Жыйылгъанла дагъыда энергетика объектлени, ток ызланы тийрелери не халда болгъанларын сюзгендиле, электрокюч бла жалчытыу тыйылса, аны болжал халда жиберген оборудованиядан неллай бири болгъанын эмда ала къайсы жерледе тургъанларын да билдиргендиле.

«Электрокюч мюлкню кюзде эмда къышда ишлетирге хазырлагъанда хар неге да бек сакъ болургъа керекди. Ол санда  ток ызланы къатларында ёсген юлкюлени къырып кетерирге, оборудованиягъа бла аппаратурагъа къарап, эски болгъан жерлерин алышындырыргъа, транспортну тинтирге, дежурный службала бла байламлыкъла къураргъа тийишлиди», - дегенди Шамиль Ахубеков.

Кенгешде айтылгъаннга кёре, отлукъ-энергетика комплексде предприятияла бу кезиуге хазырланыу программаларын тамамлап бошай турадыла. Тийишли ишлеге 448,44 миллион сом бёлюннгенди, бюгюнлюкге 306,1 миллион сомгъа мадар этилгенди. Предприятиялада 43 бригада къуралгъанды, ала 184 машина, оборудование, техника бла да жалчытыныпдыла. Авария болгъан кезиуде керек болгъан материалладан бла оборудованиядан да 96 миллион сом багъасы къыстырыкъ этилгенди. МЧС бла бирге юйретиуле да бардырылгъандыла.