Жангылыкъла

Терек бахчачыла къурагъан «Иги тирлик» деген биригиуюню келечилери бла Россельхозараны республикада бёлюмюнде тюбешиу болгъанды. Анда жемишлени жыйыуну юсюнден хапарлагъандыла.

Жангы окъуу жыл башланды. Энди орамда жюрюген сабийле да кёп боллукъдула. Аны бла байламлы Элбрус районну автоинспекторлары, ОМВД-ны жамауат советини келечилери бла бирге водительлеге жолда сакъ жюрюрге кереклисин эсгерир хыйсапда акция бардыргъандыла.

Биринчи сентябрьден башлап орта профессионал билим берген къырал учреждениялада класс башчылыкъ неда кураторлукъ этген преподавательлеге ай сайын 5 000 сом кёллендириу тёлеуле берилликдиле.

КъМР-ни Правительствосуну председателини биринчи орунбасары Сергей Говоров бардыргъан кенгешде сёз республикада эллени газ бла жалчытыуну юсюнден баргъанды. Жыйылыугъа промышленность, энергетика эм сатыу-алыу министр Шамиль Ахубеков, «Газпром межрегионгаз Нальчик» компанияны башчысы Залим Вороков, районланы эмда шахарланы администрацияларыны келечилери да къатышхандыла.

Къырал Эрмитажны экспедициясы 2016 жылдан башлап Огъары Къуркъужинде буруннгу обалада къазыу ишле бардырады. Алай былтыр эпидемияны сылтауундан ишлени тохтатыргъа тюшгенди. Хал иги жанына тюзелгенлей, быйыл августда археологла бери  келирге ашыкъгъандыла.   

«Спорт-жашауну низамы» миллет проектни чеклеринде «Халкъны саулугъуну лигасы» битеукъырал жамауат организация Россейни Спорт министерствосуну себеплиги бла «Человек идущий» деген ат бла жаяу жюрюуден эришиуле бардырады. Анга халкъны башха-башха къауумларыны келечилери командалагъа жыйылып къатышаллыкъдыла. Бир командагъа 20-50 адам кирликди, ала «Человек идущий» деген приложенияда эсепге тюшерге керекдиле, аны ючюн хакъ алынмайды. Приложение хар инсан ненча атлам этгенин санайды, анга кёре команданы рейтинги къуралады.

Кёп болмай «Эльбрусское кольцо-2021» эришиулеге къатышырыкъла, ала башланнгынчы, Тырныауузда тыйгъычладан ётюу жаны бла жараула этгендиле: тауланы къыйын жоллары бла жюрюуде эм сауутладан атыуда кеслерин сынагъандыла.  

Кёп болмай КъМР-ни Жарыкъландырыу, илму эмда жаш тёлюню ишлери жаны бла министри Анзор Езаов, Тырныауузда Элбрусну регион колледжинде болуп, тынгылы ремонт ишле къалай баргъанлары бла шагъырейленнгенди.

Алгъаракъда бизни республикада Сабанны кюню ётгенди. КъМР-ни Эл мюлк министерствосу къурагъан семинар-кенгеш бу жол нартюхню эмда чёплеуню ёсдюрюу амаллагъа жораланнган эди. Жыйылыугъа аграр илмуну, эл мюлк организацияланы, муниципалитетлени АПК управленияларыны келечилери къатышхандыла.

КъМР-ни Миллет музейинде «Къабарты-Малкъарны археология хазнасы» деген кёрмюч бардырылады бу кюнледе. Аны тарыхны эмда культураны эсгертмелерин къоруулау жаны бла Битеуроссей жамауатны жер-жерли бёлюмю къурагъанды. Материалланы Кавказны археологиясыны институту, КъМР-ни гуманитар тинтиуле институту, «Наследие» къырал предприятие бергендиле.