Буруннгу обала нени ачыкълайдыла

Къырал Эрмитажны экспедициясы 2016 жылдан башлап Огъары Къуркъужинде буруннгу обалада къазыу ишле бардырады. Алай былтыр эпидемияны сылтауундан ишлени тохтатыргъа тюшгенди. Хал иги жанына тюзелгенлей, быйыл августда археологла бери  келирге ашыкъгъандыла.   

Элде Къобанны заманларындан къалгъан обаланы жауунла талап, ала иги да тозурап барадыла. Мында алимле бизни эрагъа дери VII-III ёмюрледен къалгъан сауут-сабала, багъалы темирледен этилген абериле эмда башха затла табадыла. Бу жол а къабырда къошундан этилген уллу табакъ табылгъанды. Къабырла ичлеринде башха затла да тюбейдиле. Болсада аланы магъаналары алыкъа белгисизлей къалады.

Экспедицияны таматасы Юлия Марченко айтханнга кёре, обала минг квадрат метрден аслам жерни аладыла, ол себепден келир жылда ала бютюн эрттегили эмда сейир эсгертмелени табар муратлыдыла.

Кёп болмай къазыу ишле баргъан объектде Бахсан районну администрациясыны башчысы Артур Балкизов да болгъанды. Анга къошундан этилген затланы, багъырдан бел бауну, бичакъланы, янтарь ташдан багъалы затланы эм башха экспонатланы да кёргюзтгендиле. Артур Хачимович ташдан этилген гуллаланы къалай жарашдырылгъанларын эм башха шартланы да соргъанды. Юлия Марченко обалада янтарьны  аслам табылгъаны былайда жашагъанла Балтиканы тийреси бла тири сатыу-алыу бардыргъанларын ачыкълагъанын да билдиргенди.

Эсге сала айтсакъ, бюгюнлюкде экспедициягъа жыйырмадан артыкъ адам къатышады, ол санда Къабарты-Малкъар къырал университетни тарых факультетини студентлери да.