Жыл саннга чек салынмайды

«Спорт-жашауну низамы» миллет проектни чеклеринде «Халкъны саулугъуну лигасы» битеукъырал жамауат организация Россейни Спорт министерствосуну себеплиги бла «Человек идущий» деген ат бла жаяу жюрюуден эришиуле бардырады. Анга халкъны башха-башха къауумларыны келечилери командалагъа жыйылып къатышаллыкъдыла. Бир командагъа 20-50 адам кирликди, ала «Человек идущий» деген приложенияда эсепге тюшерге керекдиле, аны ючюн хакъ алынмайды. Приложение хар инсан ненча атлам этгенин санайды, анга кёре команданы рейтинги къуралады.

Проект эки кесекге юлешинеди. Эм алгъа, 2021 жылны 10 сентябринден 10 октябрине дери эришиуге къатышырыкъ адамланы тизмеси жарашдырыллыкъды, аладан командала къураллыкъдыла, юйрениуле бардырыллыкъдыла. Ызы бла  15 октябрьден 15 ноябрьгъа дери эришиуле кеслери ётдюрюллюкдюле. Ахырында хорлагъанланы онлайн халда саугъалау боллукъду.

Проектге къатышыргъа муниципал, корпоратив, студент къауумла, пенсиячыла, гражданланы биригиулери чакъырыладыла.