Иги урлукъ – бай тирликни ышаны

Алгъаракъда бизни республикада Сабанны кюню ётгенди. КъМР-ни Эл мюлк министерствосу къурагъан семинар-кенгеш бу жол нартюхню эмда чёплеуню ёсдюрюу амаллагъа жораланнган эди. Жыйылыугъа аграр илмуну, эл мюлк организацияланы, муниципалитетлени АПК управленияларыны келечилери къатышхандыла.

Республиканы эл мюлк министр Хасан Сижажев айтханыча, чёплеу бла нартюх бизни регионда тёрели халда ёсдюрюлюучю битимледиле. «Экинчисине жылдан- жылгъа аслам жер бёлюнеди. Сёз ючюн, 2010 жылда ол 67,5 минг гектарда ёсдюрюлген эсе, быйыл 138 мингден атлап, аны бла эки кереге кёбейгенди. Тирликлилиги да къууандырады: сагъынылгъан кезиуде 48 процент къошуп, гектардан 70 центнерге жетгенди», - дегенди ол.

Министрни оюмуна кёре, быллай иги эсепле эм биринчиден сугъарыу амалла сингдириле баргъаны ючюн болгъандыла. Аны бла байламлы «Россейни мелиорация комплексин айнытыу» деген программа барды.

Бюгюнлюкде республикада сабанлагъа суу салгъан 212 машина барды. Ала жыйырма мингден артыкъ гектар жерлени сугъарадыла. Ол санда 38 машина быйыл ишлеп башлагъандыла. Жылны ахырына дери уа быллай жерлени ёлчеми 5,4 минг гектаргъа кёбейирикди.

Нартюхню гибридлерини урлукъларын чыгъарыугъа бизни республикада бек уллу магъана берилгенин да туура этгенди Хасан Сижажев. «Аланы качествосун андан ары игилендирип, энчи бренд къурап, бу сферада тийишли жерни алыу – бизни бек уллу борчларыбыздан бириди», - деп чертгенди министр.

Семинар-кенгешге къатышханла сабанлагъа къарагъандыла. Нартюхден сора алада чёплеу да бар эди. Ол да бизни республикада иги битеди, жыл сайын 15 мингден артыкъ гектарда ёсдюрюледи. Аны тирликлилиги да ёсе барады, быйыл 21 центнерге жетгенди. Тенглешдирип айтханда, буруннгу жылны кёрюмдюсюнден - 13 процентге, 2015 жылныкъындан а  40 процентге окъуна кёпдю ол. Бу шарт урлукъла игиден-иги бола баргъанларын, шёндюгю технологияла да кенг хайырланып тебирегенин кёргюзтеди.