Сансызлыкъны хатасындан ачымазча

Тири солууну сюйгенле къышны бегирек сакълайдыла, къар жаугъанлай, кёп курортла ачыладыла.  Минги тау да къыш солууну эм белгили араларындан бириди. Элбрусда лыжа жолланы узунлукълары 16 километрден асламдыла. Болсада таулада къышда солууну къоркъуусузлукъ бла байламлы кесини энчиликлери да барды. Аны ючюн Россейни МЧС-ини регионда бёлюмю туристлеге жорукъланы эсгертирге излейди.
  
Алай бла, эм алгъа, курт тюшерге къоркъуулу жерледе къутхарыучуланы эм къар юзюлюуге къажау службаны ишчилерини буйрукъларын толтурургъа керекди. Буруула орнатылгъан неда кирирге эркин этмеген белгилери болгъан жерлеге бармазгъа, къар бек жаугъанда, жел къаты ургъанда, туман басханда,  учаргъа хазыр этилмеген жоллагъа бла тиклеге чыгъаргъа жарамайды. Къар юзюлюрюне къоркъуу бар эсе, ишеклик туудургъан жерледен бирем-бирем ётерге, курт келе тура эсе, ол баргъан жолдан бир жанына терк кетерге, къая жух эслене эсе, аны артында бугъаргъа тийишлиди. Аллай амал жокъ эсе, адыргы этмегенлей, лыжаланы бла таякъланы къоюп, тургъан жеригизде къалыгъыз, хауа келирча мадар этигиз. Ажашсагъыз неда танымагъан жерге чыгъып къалсагъыз, кюнню халы терк тюрленип, къар юзюлюрюн кёргюзтген ышанлагъа эс буругъуз, ала быладыла: жел къаты уруп, къар бек жаугъаны, тикни башында къардан карнизле тагъылгъаны, терк сууукъ болгъаны, къарны юсю бла къар тугулла баргъанлары, къаргъа сюелгенде тунакы таууш, чунгурла ачылгъанлары.

Ведомствону Элбрус бийик тау излеу-къутхарыу отряды турист къауумладан сакълыкъ излейди. Аны номерлери:  8(86638) 7-14-89, 8 928-694-51-19.