Кавказны табийгъатына сакъ кёзден

Бу кюнледе Нальчикде Суратлау искусстволаны А. Л. Ткаченко атлы музейинде «Кавказны табийгъаты» деген кёрмюч ачылгъанды. Ол Къабарты-Малкъар къырал университетде бу кюнледе бардырыла тургъан «Тау экосистемала эм аланы компонентлери» деген Битеуроссей конференцияны чеклеринде къуралгъанды, кеси да 29 сентябрьге дери ишлерикди.

Кёрмючде бизни республиканы эм Дагъыстанны суратчы-художниклерини ишлеринде Кавказны ариу табийгъатын, къаяланы, тау этекледе жашагъан кийик жаныуарланы, къанатлыланы, гюллени кёрюрге боллукъду.

Суратлау искусствону бу жанрында кюрешген художникни иши женгил тюйюлдю. Кёкде учуп баргъан сейирлик къанатлыны, бата тургъан кюнню таякъларында жылыудан юлюшюн алыргъа ашыкъгъан таш макъаны, табийгъатны тюрсюнлю бояуладан толу ариу жеринден къараучуну кёлюн толтургъан сюжет этип суратха алгъан, сёзсюз, къыйынды.

Алайды да экология суратлау искусствогъа сейирлери болгъанланы бу кюнледе музейде сакълайдыла.