Россейли жашаугъа чырмаусуз сингдириледиле

РФ-ни  жангы регионлары къыралны социал жашаууна сингдириледиле. Къырал Дума бу жаны бла законланы биринчи окъулууда къабыл кёргенди.

Донецк эм Луганск халкъ республикалада бла Херсон эм Запорожье областьлада, россейли низамгъа тийишлиликде, социал себепликни мадарлары 1 мартдан ишлеп башларыкъдыла. Пенсияла эм хар ай сайын тёлеуле россейли законлагъа кёре саналлыкъдыла. Аланы жангыдан тергегенде,  ёлчеми азайгъаны ачыкъланса, регионла башхалыкъны тёлерикдиле. 

 - Хар инсанны да къолайлыгъын сакълар ючюн къолдан келгенни этерикбиз. Жангы регионлада жашагъанла, аладан тышына кетгенле да 2024 жылда 29 февральгъа дери пенсияланы жарашдыраллыкъдыла. Ахча 1 мартдан тёленип башларыкъды,-дегенди «Единая Россияны» Къырал Думада фракциясыны таматасыны орунбасары, «Ахшы иш – юйюрде къолайлыкъ» халкъ программаны жашауда бардырыугъа жууаплы Андрей Исаев.

  Социал болушлукъну жарашдыргъанда жангы регионланы инсанлары украин тилде документлени кёргюзтюрге боллукъдула. Ишчи стажына шагъатлыкъ  документлери болмагъан инсанлагъа болушлукъгъа ведомствола аралы комиссияла къураллыкъдыла.

Сакъатлагъа  тёлеуле россейли законлагъа тийишлиликде тохташдырыллыкъдыла.   Андрей Исаев билдиргенича, жангы регионлада ишчилеге больничныйни санагъанда 2022 жылда 30 сентябрьде къоншу регионлада орталыкъ айлыкъны ёлчеми эсге алынырыкъды. Сёзге, Донецк эм Луганск халкъ республикала Ростов областьха тенг этиледиле. Анда уа  орталыкъ айлыкъ 40,2 минг сомгъа жууукъду. Херсон эм Запорожье областьлада уа  Кърымгъа кёре саналлыкъды– 37,3 минг сом.

Чернобыль атом станцияда аварияны кетергенлеге да льготала тохташдырыллыкъдыла. Украинаны сыйлы донору деген ат жюрютгенлени уа «Россейни сыйлы донору»  белгиге тийишли болгъанла бла тенг этилликдиле.

 Къырал Дума биринчи окъулууда жангы регионлада саулукъ сакълауну эм дарманла бла жалчытыуну юслеринден законланы да къабыл кёргенди. Медицинада эм фармакологияда ишлерге эркинлик берген сертификатланы кючлери 2026 жылда 1 январьгъа дери сакъланадыла, андан сора уа аккредитация россейли законлагъа кёре бардырыллыкъды.

Билим бериуде да бардырыладыла россейли законлагъа сингдирилиу жумушла. РФ-ни жангы жерлерини юслеринден законла кючлерине киргенден сора илму атланы атауну низамы белгиленирикди РФ-ни жангы субъектлеринден устазла 2024 жылда 1 сентябрьге дери аттестациядан ётмезге эркин этилгендиле.

Вузлагъа   билим бериу организация бардыргъан сынауланы, неда Бир къырал экзаменни эсеплерине кёре аллыкъдыла студентлени. Магистратурагъа, аспирантурагъа, ординатурагъа, ассистентурагъа   сынауланы эсеплерине кёре аллыкъдыла. ДНР-де бла ЛНР-де бакалавриат, специалитет эм магистратура даражала Россейде бийик билимни   илму даражаларына  тенг этиледиле. 

- Къыралыбызны инсанлары барысы да бир праволу болумда жашаргъа керекдиле. Социал себепликни низамы быйыл 1 мартда ишлеп башларыкъды, ол санда аналыкъ капиталны, пенсияланы, сабийлеге ахчаны тёлеу да. Битеу башламчылыкъланы биз ал болжалда тинтебиз. Ол а жангы регионланы инсанларына ала ючюн къайгъырыулукъ уллу болгъанын сезерге онг береди,-дегенди бу башламчылыкъланы юслеринден РФ-ни Къырал Думасында КъМР-де депутат Виктория Родина.

РФ-ни Къырал Думасыны депутаты Геккиланы Заур жангы субъектле россейли социал системагъа сингнген кезиуде хар адамны да къолайлыгъына энчи эс бурулгъанын айтханды.

- РФ-ни Конституциясында инсанлагъа социал гарантияла тохташдырылыпдыла, ала къайда жашагъанларына да къарамай. Жангы субъектлени халкъы  къыралда болгъан эркинликле бла чырмаусуз хайырланыргъа керекдиле. Битеу бу жумушла хар адамны да сейирлери эсге алынып тамамланадыла,-дегенди Геккиланы Заур.