Черек районда урлукъ себиу барады

Жаз башында сабан ишлени Черек районда 3140 гектарда бардырыргъа умут этедиле. Республиканы Эл мюлк министерствосунда белгилегенлерича, андагъы аграрийле урлукъла бла толусунлай жалчытылыныпдыла. Минерал семиртгичледен да керекли мардасындан 90 процентин ташып къыстырыкъ этгендиле. Техниканы юсюнден айтханда, бу жаны бла бир тюрлю чурум жокъду.

Алай бла бу кюнлеге аграрийле кюзлюклеге семиртгичлени жайыу бла кюрешедиле. Быйыл ала битеу да 1650 гектарны аладыла. Ол санда будай – 650, рапс – 300, арпа – 250 гектарда ёсдюрюледиле. Специалистле оюм этгенлерича, ала иги халдадыла.

Жазлыкъланы урлукълары уа 3140 гектаргъа себилликдиле. Аны аслам кесегин (2010 га) нартюх аллыкъды. Андан сора да, чёплеу – 200, картоф – 500, мал ашха жараулу нартюх – 430 гектарда битерикдиле.

Кюнню халы аз-маз чурум этгени ючюн мюлклени кёбюсю сабанлагъа кечирек чыкъгъандыла. Къалай- алай болса да, Черек районну аграрийлери ишни заманындан кеч къалмай тындырыргъа таукелдиле.