Кеслери алларына иш къурап уруннганлагъа къыралны жанындан болушлукъ этиледи

Къабарты-Малкъар Республикада гитче эм орта предпринимательлик   иш бла кюрешгенлеге финанс болушлукъну КъМР-ни Гарантиялы фонду эм республиканы гитче эм орталыкъ предпринимательликни субъектлерине микрокредитле берген фонду этеди.

Гарантиялы фонд 2021 жылда  битеу да 279 миллион сомгъа 39 поручительство  бергенди.  Андан сора да микрокредитле берген фонд  гитче эм орта  предпринимательликни субъектлерине эм кеслери алларына иш ачып уруннган инсанлагъа битеу да 69 миллион сомгъа жууукъ 166 микрозайм юлешгенди, деп билдиргендиле республиканы оноучусуну пресс-службасындан.  

Республикада шёндю  алты бизнес-инкубатор барды, ала гитче эм орталыкъ предпринимательствону субъектлерине ырысхы жаны бла болушлукъ бередиле. 2022 жылны  аллына бизнес-инкубаторлагъа 72 предпринимательге отоула берилгендиле, ала 296 ишчи жер къурагъандыла.

 Андан сора «Мени бизнесим» деген ара шёндю жумушла толтуруп тебирегенди. Аны хайырындан,  республикадан гитче эм орта предпринимательлик  иш бла кюрешген 44 товар чыгъарыучу,  продукцияларын халкъла аралы электрон сатыу-алыу майданлада орнатадыла. Озгъан жылда предпринимательликге себеплик этиу бла байламлы федерал программала жашауда бардырылгъандыла. Федерал бюджетден гитче эм орта предпринимательлик   иш бла кюрешгенлеге эм жумушларын тюрлю-тюрлю бёлюмледе бардырып, коммерциялы болмагъан социал ишни толтургъанда пандемияны хатасындан хайыр тюшюралмагъан биригиуледе ишлегенлеге иш хакъны бек аз ёлчеми чакълы бир грантла берилгендиле. Андан сора башда сагъынылгъанла льгота халда 3 процентден атламагъан кредитле алгъандыла.

Федерал налог службаны КъМР-де управлениясыны билдириуюне кёре, озгъан жылны ноябрь айына  1035 налог тёлеучю алада  болгъан 3216 ишчиге грантла  алгъандыла.  Саулай да сагъынылгъан инсанлагъа къыркъ бир миллион сом тёленнгенди.   Андан сора да  «Гитче эмда орта предпринимательлик бла кеслерине энчи иели иш ачаргъа сюйгенлеге болушуу» деген федерал программаны чеклеринде эки айны ичинде 43 предприятие 114 миллион сомдан аслам льгота кредитле алгъандыла. «Гитче эм отра предпринимательликни эм энчи предпринимательлик ишде башламчылыкъгъа  болушлукъ этиу» миллет проектни жангы структурасына кёре, республикада регион проектле жашауда бардырыладыла. Аланы санында «Кеслерине энчи иели иш ачаргъа сюйгенлеге тап болумла къурау», «Ишни башланнганда аны къурагъаннга женгил онгла бериу» эм башха проектле ишлейдиле. Озгъан жылда сагъынылгъан регион проектлени жашауда бардырыргъа 144 миллион сом бёлюннгенди, ырысхыла  эл мюлк бёлюмде предпринимательлик  иш бла кюрешгенлеге себепликге берилгендиле. 

 «2021 жылда энчи налог эсеп кийирилгени бла байламлы кеси алларына иш къурап кюрешгенлени саны сегиз кереге кёбейгенди.  Бюгюнлюкде аллай амал  бла предприниматель ишни бардыргъанланы саны 15589 инсаннга жетгенди. Башхача айтханда, къырал адамлагъа бизнесни таза, ачыкъ бардырыргъа онгла къурайды, ол пандемияны кезиуюнде уллу магъананы тутады. Эсепге тюшюп, иш къурагъанла 900 миллион  сом багъасы сатыу-алыу этгендиле, ол суммадан бюджетни битеу тюрлюлерине 21 миллион сом ётдюрюлгенди» - деп, айтылады билдириуде.

Бизни корр.