Республиканы Башчысы белгили алимни юбилейи бла алгъашлагъанды

Къабарты-Малкъар Республиканы Башчысы Казбек Коков Москвада Финанс университетни алим советини байрам халлы жыйлыууна къатышханды. Аны чеклеринде экономика илмуланы доктору, профессор, Россей Федерацияны илмусуну сыйлы къуллукъчусу, Россей Билим бериу академияны академиги Михаил Эскиндаровну анга 70 жыл толгъаны бла байламлы хурметлегендиле.

Къабарты-Малкъарны Башчысы юбиляргъа алгъышлау сёзюнде былай айтханды: «Сиз жашауугъузну сюйген ишигизге жоралагъансыз, ахшы кадрланы хазырлап, къыралны, Къабарты-Малкъарны айныууна уллу юлюш къошхансыз». Казбек Коков Михаил Эскиндаровха саулукъ-эсенлик, илму эм жамауат ишинде мындан арысында да жетишимле тежегенди.

Къууанчха Россейни финансла министри Антон Силуанов, Къарачай-Черкес Республиканы Башчысы Темрезланы Рашид, Дагъыстан Республиканы Башчысы Сергей Меликов, Адыгея Республиканы Башчысы Мурат Кумпилов, къырал эм жамауат къуллукъчула къатышхандыла.

Михаил Эскиндаров 2006 жылдан башлап Финанс университетге 15 жылны башчылыкъ этгенди, аны илму къуллугъу мындан арысында вузну президентича бардырыллыкъды.  М. Эскиндаровну ректорну къуллугъунда профессор Станислав Прокофьев алышындырлыкъды, Федерал казначействону таматасыны орунбасары эм «Къырал эм муниципал управление» кафедраны заведующийи.

М. Эскиндаров беш жюзден артыкъ илму ишлени, монографияланы, дерсликлени эм башха-башха илму журналлада статьяланы авторуду. Алимни сейирлери производствону тийишлилиги, финанс-промышленный къауумланы айныулары, къырал управление, экономика жарсыула, бийик билим бериу дегенча темала бла байламлыдыла.

М. Эскиндаров Финанс университетге таматалыкъ этген заман жаснауну кезиую болгъанды. Университетде билим алып чыкъгъанланы асламысы, ол санда Къабарты-Малкъар Республикадан да келечиле, экономика, финансла, къырал управление, производство жаны бла жетишимли оноучула болгъандыла. Бюгюнлюкде университет россей бийик билим бериуде, тийишлисича, алчыгъа саналады.