«Не жумушну да къолгъа базыныулу алсагъыз, ол къураллыкъды, игиден-иги бола барлыкъды»

КъМР-ни Башчысы Казбек Коков Къабарты-Малкъар Республиканы Жаш тёлю правительствосуну жангы къауумуну жыйылыуун бардыргъанды. Анга КъМР-ни Правительствосуну Председатели Мусукланы Алий, министерстволаны башчылары, Жаш тёлю правительствону къаууму да къатышхандыла.

Кесини алгъышлау сёзюн, республиканы оноучусу былай башлагъанды: «Жаш тёлю правительство Къабарты-Малкъар Республиканы Башчысында кенгеш орган болгъаны себепли, сиз барыгъыз да бизни - мени, Правительствону таматасыны, министрлени кенгешчилерисиз». Андан ары сёлеше, Казбек Коков заман бир да болмагъанча терк баргъанын, дуния да алгъындан эсе терк тюрленнгенин чертгенди. «Технологияла, окъутуу, билим бериу да бек теркленнгендиле. Алай жаш тёлю жангылыкълагъа, тюрлениулеге къабыргъасын кимден да терк жарашдырады, къарап-къарагъынчы къырал оноугъа къатышып тебирейди, кертиди, алгъа жамауат ишгеча киришеди», - деп ангылатханды Казбек Коков.

Республиканы Башчысыны Жаш тёлю правительствону къаууму бла ушагъы ачыкъ эмда эркин халда баргъанды. Жаш адамла, анга соруула бергенлери бла къалмай, дунияда, къыралда, республикада да бола тургъан ишлени юслеринден оюмларын да билдиргендиле. КъМР-ни Жаш тёлю правительствосуну таматасы Инал Кушхов а мындан ары бардырыллыкъ баш магъаналы ишлери бла шагъырей этгенди. Сёз жаш тёлю жамауат организациялагъа грантла бла тутхучлулукъ этиуню, республикада спортну жангы тюрлюлерин айнытыуну, саулукъ сакълауда бла билим бериуде кемчиликлени, жаш предпринимательлеге себеплик этиуню юсюнден да баргъанды.

Жаш адамла  дагъыда экологияны, шахарланы тап халгъа келтириуню юсюнден да сёлешгендиле, бюгюнлюкде социал сетьледе айтылып тургъан ётюрюклени, осал ниетлени къалай бла тыяргъа боллугъуну юсюнден кеслерини оюмларын айтхандыла.

Жаш тёлю правительствону жарыкъландырыу министри Тимур Арамисов а республикада бюгюнлюкде жаш тёлюге кеслерини хунерликлерин кёргюзтюрге уллу онгла ачыла баргъанларын эсгертгенди, жыйылгъанланы эслерин школлада бола тургъан тюрлениулеге бургъанды. Алада энди ёсерге жангы амалла къураладыла, мастерскойла, терк ачылгъан Интернет да бардыла. Жаш министрни оюмуна кёре, республиканы школларында алыннган билим, къошакъ халда окъутуу, жамауат ишге къатышыу жаш адамларыбызгъа къыралны баш магъаналы вузларына кирирге онг бередиле.

Казбек Коков жаш министрлени министерстволада болгъан жамауат советлеге къошаргъа кереклисини юсюнден оюмну дурус кёргенди эмда аланы министерстволаны башчылары бла бирге ишлеуню онгларына къараргъа буюргъанды. Андан сора да, ол Жаш тёлю правительствогъа ишни къурау, методика жаны бла да болушлукъ этерге кереклисин эсгертгенди.

Ахырында Казбек Коков жаш адамлагъа былай айтханды: «Власть - ол бек алгъа адамланы алларында жууаплы болууду. Властьха итине, сиз бек алгъа ма аны юсюнден сагъыш этерге керексиз. Не ишни да къолгъа базыныулу халда алсагъыз, ол заманда ишигиз барлыкъды, къолугъуздан кёп зат да келликди. Алай болса, мен республиканы келир заманы ючюн ырахатма».