УРУНУУНУ АРИУЛУГЪУ АНЫ ЖАШАУ ЖОЛУН ЖАРЫТХАНДЫ

КъМР-ни Къыраллыгъыны кюнюне

Хасаитланы Лиза, Жолабланы Локъманны къызы, Тырныауузда жашайды. Районда, республикада, андан тышында да таныулу адамды. Россейни коммунист партиясыны ара комитетини «Партийная доблесть» деген ордени, «За трудовое отличие» майдал, эки кере къыралны электротехника промышленностуну, Мамырлыкъны советини белгилери, Комсомолну ара комитетини «Молодой гвардеец пятилетки» деген алтын белгиси бла да саугъаланнганды. Тырныауузну жер-жерли самоуправлениясына, КъМР-ни Парламентине да эки кере депутатха айырылгъанды.

Урунуу жолун Тырныауузда аз вольтлу аппаратура чыгъаргъан заводда Станок артында кёп тюрлю операциялагъа юйреннгенди. Орджоникидзеде тау-металлургия техникумда окъугъанды. Анга цехге тамата этгенде, анга жыйырма эки жыл да толмагъан эди. Онтёрт жылдан а аны кадрланы бёлюмюне тамата этгендиле.

1999 жыл эди, аны республикада урунуу эм социал къоруулауну министерствосуну Элбрус районда арасына ишге чакъыргъандыла. Алайда бир кесек ишлегенлей, халкъны жашау жумушларын жалчытыуну  биригиуюню таматасына салгъандыла. Бюгюн-бюгече да анда ишлейди.

Лиза 1975 жылдан бери Россейни коммунист партиясыны члениди.  Бюгюн да аны ызын тюзге санайды. КъМР-ни Парламентини бешинчи, алтынчы чакъырылыуларыны депутаты болуп тургъанды.

Жашауун Хасаитланы Мухтар бла байлагъанды. Ала бир заводда ишлегендиле. Мухтар анда ОТК-ны таматасы, директорну орунбасары да болуп тургъанды. Ала жаш ёсдюргендиле – Хасаитланы Руслан республикада, андан тышында да белгили жырчы, композиторду.