Казбек Коков Правительстволу комиссиягъа республикада жол къурулушда болумну юсюнден билдиргенди

КъМР-ни Башчысы Казбек Коков РФ-да Регионланы айнытыу жаны бла правительстволу комиссияны президиумуну жыйылыууна къатышханды. Анда  «Къоркъуусуз эмда тынгылы автомобиль жолла», «Жашау журтла бла шахар болум» миллет проектлеге кёре жолланы ишлеу эмда жашау журтланы хайырланыугъа бериу не халда болгъанына къаралгъанды.

Кенгешни РФ-ни Правительствосуну Председателини орунбасары Марат Хуснуллин бардыргъанды. Ол Къабарты-Малкъарда миллет проектле бла байламлы кёп жумуш тындырылгъанын, белгиленнген ишлени толтуруу тири баргъанын айтып, ыразылыгъын билдиргенди.

«Къоркъуусуз эмда тынгылы автомобиль жолла» миллет проектни юсюнден айта, Казбек Коков быйыл жолла бла байламлы 116 объектде тийишли ишле бардырыргъа белгиленнгенин, ол ишлеге бёлюннген ахчаны ёлчеми 1,7 миллиард сомдан аслам болгъанын, андан 1,3 миллиарды республикалы эмда жер-жерли бюджетледен берилгенин чертгенди.

Шёндю окъуна 102 объектде белгиленнген ишле тамамланнгандыла, автомобиль жолланы 92 километри тап халгъа келтирилгендиле. Ол а планны  80 процентин тутады. Бёлюннген ахчаны 85 проценти чакълы бири хайырланнганды, Ол а  1,5 миллиард сомду. Республиканы башчысы битеу ишле да сентябрьге бошаллыкъларына ышандыргъанды.

Казбек Коков Россейни вице-премьерине, РФ-ни Правительствосуна регионнга кёз-къулакъ болгъанлары, болушханлары ючюн жюрек ыразылыгъын билдиргенди. РФ-ни Правительствосуну къыстырыкъ фондундан берилген 200 миллион сомну хайырындан жылны ахырына дери жолланы энтта да 16 километрин жангыртыргъа онг  чыгъарыкъды, дегенди. Ол айтханыча, республиканы бюджетинден да миллет проектни толтуруугъа 285 миллион сомдан артыкъ бёлюннгенди.

«Къабарты-Малкъарны жол къурулушуна быйыл бир заманда да болмагъанча кёп ахча тюшгенди. Жолланы 160 километрин тап халгъа келтирирге деп турабыз. Республика жол къурулушда бютюн уллу борчланы толтурургъа хазырды»,-деп ышандыргъанды Казбек Коков.