Сёз адамланы къоркъуусузлукъларын жалчытыуну юсюнден баргъанды

КъМР-ни Башчысы Казбек Коков республикагъа официальный жумуш бла келген Россейни СКФО-да МВД -ны таматасы  полицияны генерал-полковниги Сергей Бачурин бла ишчи тюбешиу бардыргъанды. Анга Къабарты-Малкъар Республиканы ич ишле министри Василий Павлов да къатышханды.  Анда   право жаны бла низамлыкъны  эм байламлыкъны кючлеу соруула  сюзюлгендиле.

Шимал-Кавказ федерал округну полициясыны таматасы белгилегеннге кёре, сентябрде ётдюрюллюк айырыулагъа деп ич ишле органла комплексли къурау ишле бардырадыла. Регионну полициясы, инсанла кеслерини конституциялы эркинликлерин толтурур ючюн, битеу сейирлери болгъан органла эм структурала бла байламлыкъдадыла.

Тюбешиуде Къабарты-Малкъар Республикада хал тап болгъаны айтылгъанды. Регионну Башчысы белгилегеннге кёре, республиканы власть органлары право сакълаучу ведомстволары бла профилактика ишни бирге бардырадыла, ала регионда экстремизмге къажау сюелиуге эм  право жаны бла низамлыкъны жалчытыугъа себеплик этедиле.

Сергей Бачурин СКФО-да полиция орган къуралгъанлы 10 жыл болгъаны бла байламлы чыкъгъан эсде къаллыкъ майдалны Къабарты-Малкъар Республиканы Башчысына бергенди.

Казбек Коков Россейни СКФО-да МВД-сыны таматасына республиканы полиция органларына дайым эс буруп тургъаны ючюн ыразылыгъын билдиргенди эмда эки жаныны да бирге ишлеуюню эсеби уа  башда сагъынылгъан мероприятиялада адамланы къоркъуусузлукъларын жалчытыу болгъанын чертгенди.

 Бизни корр.