Къурулуш эмда жол ишле къалай баргъанларына къарагъанды, кемчиликлени кёргюзтгенди, буйрукъла бергенди

Казбек Коков Прохладный шахар округда, Прохладный эмда Май районлада къурулуш эмда жол ишле къалай баргъанларына къарагъанды.

Ишчи жолоучулугъуну кезиуюнде КъМР-ни Башчысы Пролетарское элде школда ремонт ишлени барыу халларын кёргенди. Бу школну юсюнден аны «Тюзюнлей эфирини» кезиуюнде Прохладный райондан Галина Силенкова билдиргенди. Республиканы оноучусу жангыртыу ишлени качестволарына, аланы тамамланыу болжалларына да ыразы болмагъанды, кемчиликлени кёргюзтгенди. Бу объект мындан ары районну администрациясыны башчысы Андрей Журавлёвну энчи контролюнда боллукъду.

КъМР-ни транспорт эмда жол мюлк министри Аслан Дышеков бла бирге республиканы Башчысы Прохладный шахар округда бла Май районда быйыл «Къоркъуусуз эмда тынгылы жолла» деген программагъа кёре жангыртыла тургъан объектледе да болгъанды.

2020 жылда Прохладныйге ишчи жолоучулукъларындан биринде Казбек Коков шахарны баш жолун – Головко орамны эмда анга къошулгъан Больничный, Почтовый, Лесной тыгъырыкъланы да тап халгъа келтирирге буюргъанды. Ремонту бара тургъан жолну узунлугъу 5,7 километрди. Орамгъа къол тиймегенли онбеш жылдан артыкъ болады. Анда уа магъаналы социал объектле орналыпдыла: школла, сабий садла, темиржол вокзал, саулукъ сакълауну учреждениялары, МФЦ, Краеведение музей.

Ремонт ишлеге бордюрланы, асфальтны алышындырыу, чыракъла салыу, жангы жаяу жолчукъла ишлеу киредиле. Бюгюнлюкде жолчула тротуар бордюрланы бла жол люкланы сала турадыла. Битеу ишле октябрьде бошаллыкъдыла.

Республиканы Башчысы жокълагъан башха уллу объект – Прохладный-Эльхотово автомобиль жолну 12 километр чакълы бирни тутхан кесегиди. Ол Май районну жери бла ётеди эмда Майский шахарны, Котляревская бла Александровка станицаланы бирге байлайды. Жолну бу кесеги РСО-Аланияны чегине элтген баш магъаналы транспорт маршрутланы бирини кесегиди. Андан сора да, анда Аргудан сууда кёпюрге да ремонт этилгенди, тёрт километр чакълы бирде тротуарла жангыдан салыннгандыла, автобус тохтаучу жер да тапландырылгъанды. Объектни биринчи сентябрьге хайырланыргъа берирге белгиленеди.