Республиканы бюджетине иги кесек ахча ётдюрюлгенди

Федерал налог службаны Къабарты-Малкъарда бёлюмю быйылны беш айында къыралны бюджетине 6,1 миллиард сом ётдюргенди. Аны бла бу кезиуге салыннган борч артыгъы бла толтурулгъанды, озгъан жылны кёрюмдюсю бла тенглешдиргенде уа 9,4 процентге кёбейгенди, деп билдиргендиле ведомстводан.

Сагъынылгъан ахчадан 1,1 миллиарды (+7,3%) федерал бюджетге жиберилгенди, къалгъан беш миллиард сом а (+22,4%) республиканы кесинде къалгъанды. Ол санда 3,8 миллиард сом (+28,5%) КъМР-ни бюджетин толтургъанды, жер-жерли бюджетлеге уа 1,2 миллиард сом (+6,2%) бёлюннгенди.

Страховой тёлеуле бла бюджетледен тышында фондлагъа 3,7 миллиард сом жыйылгъанды. Мында да иги ёсюм (+19,4%) эсленеди. Бу ахчадан 2,8 миллиардын (+11,6%) Пенсия фонд тийишдиргенди. Болжаллы халда ишсиз къалгъанла эмда аналыкъ бла байламлы социал страхованиягъа тёлеуледен  0,3 миллиард сом келгенди. Былтыр биринчи июльдан башлап бу ахча тюзюнлей тёленип тебирегени себепли мында ёсюм тёрт кереден атлагъанды.

Энтта да бир тёлеу бла – ишлегенлени борчлу халда медицина страхование этиу бла тийишли Фонд 0,6 миллиард сом (+12,5%) къоллу болгъанды.