Жолла мардалагъа келиширча

Быйыл Къабарты-Малкъарда «Къоркъуусуз эм качестволу автомобиль жолла»  миллет проектни чеклеринде 21  республикалы магъаналы жолну   жюз  километр чакълы бирине ремонт этилликди. Ол санда 134 метр чакълы бирде  беш кёпюрге.

Алгъадан  этилген планнга эм келишимлеге  тийишлиликде, къышда окъуна  объектлени  13-де ишле башланнгандыла. Жылыула келгинчи  окъуна  аланы кёбюсюнде эски  бордюрланы, белгилени эм асфальтны да  кетерип бошагъандыла. Аны бла бирге къоркъуусузлукъну жалчытырча мадар да этилгенди.

Урван районда объектлени кёбюсю битерге кёп къалмагъанды. Сёз ючюн, Кахунда юч километр чакълы бирде асфальт салып бошагъандыла. Энди   белгиле орнатыллыкъдыла эм жорукъланы билдирген  ызла тартыллыкъдыла.  Жолчула Герменчик, Эски Черек, Светловодское, Октябрьское, Шордаково эм Белокаменское элледе 21,3 километрде  асфальт салгъандыла.

Аны бла бирге   Анзорей, Жемтала, Псыншоко, Алтуд элледе жолланы мурдорун кючлеп, хазырлап кюрешедиле. Бусагъатда ишле 18 километрде тамамланнгандыла.   Ызы бла асфальтни жайып тебирерикдиле.
Эсге сала айтсакъ, быйыл Элбрус, Псыхурей, Этоко, Батех, Куба-Таба, Жемтала, Псыншоко, Красноармейское, Эски Лескен, Экинчи Лескен, Кахун, Герменчик, Янтарное, Октябрьское элледе жолла жангыртылынып, мардалагъа келиширча боллукъдула.

КъМР-ни Транспорт эм жол мюлк министерствосу не заманда да жолда къоркъуусузлукъгъа аслам эс бурады. Быйыл кече жарытырча  чыпынлы чыракъла регион жолланы  27 километринде тартыллыкъдыла. Алай бла Инаркойну, Огъары Курпну, Малканы, Плановское эм Псыхурейни ара орамлары жарырыкъдыла. 

Нальчикде да Къабарты орамгъа тынгылы ремонт этилгени бла бирге, «Таза кёк» программаны чеклеринде 4,6 километр чакълы бирде чыпынлы чыракъла орнатып башлагъандыла.

Аны бла  бирге жаяу жюрюгенле жолдан къоркъуусуз ётерча мадар этиледи, ол санда быйыл аллай 16 объект къуралгъанды.   Былтыр миллет проектге кёре, 478  «акъыллы»  светофор салыннганды.  Жууукъ заманда 2660 метр темир буруу тартыргъа эм 4,7 километрде уа жангыларына алышыргъа  план барды.

Бар  ишле да графикге кёре барадыла.  Ала  бюгюннгю мардала бла излемлеге келиширча  министерствону жанындан  дайым  къаты контроль этиледи.