Тамамланнган эм этилирге керек жумушла сюзюлгендиле

Кёп болмай Чегем районну администрациясыны башчысы Юра Борсов бардырып  ишчи кенгеш болгъанды. Ол тамамланнган эм этилирге керек жумушлагъа  жораланнганды.  Анга  Чегем районда ич ишлени таматасы  Мурат Бетрозов,  прокурорну тамата болушлукъчусу  Алексей Луценко,  военком  Арсен Татуев эм башхала къатышхандыла.
Тюбешиуде  биринчи бу кюнледе  призыв къалай баргъаныны юсюнден айтылгъанды. Ол санда  бюгюнлюкде   районда  къуллукъгъа чакъырылыргъа борчлуланы саны  жюзге жууукълашханын, ала бусагъатда тийишли инстанцияланы ёте тургъанлары билдирилгенди.   Аны бла бирге    РФ-ни Къоруулау министерствосуну Генерал штабында  Украинада энчи аскер операциягъа срочниклени  жибермезликлери да  эсге салыннганды.      

 Эллени таза суу бла жалчытыугъа да аслам эс  бурулгъанды.  Аны чеклеринде  район бюджетге Чегем шахарда, Экинчи Чегемде, Шалушкада  саулай беш километрден артыкъ  жерде быргъыланы алышып кюрешгенлери, Каменкада да уллу аварияны кетерирча мадар этилгени айтылгъанды.   Дагъыда«Таза суу»  федерал  программагъа кёре, Нартанда  бла Лячинкъаяда водозаборла жангыртыллыкълары белгиленнгенди. Водоканалланы таматаларына да  сууну  графикге кёре тыяргъа эм ремонт ишлени кезиуюнде  айгъа бир кереден кёп жапмазгъа  буюрулгъанды.

 Къачан да  муниципалитетде эллени санитар болумларына  аслам эс бурулады.  Бу жаны бла ич ишлени келечилерине да тири ишлерге  эм бузукълукъ этгенлени административ жууапха тартыргъа чакъыргъандыла.  Ол санда 16 эм 23 апрельде тёрели  субботник ётериги да  эсге салыннганды.

Бу кюнледе  «Иги шахар болум къурау» федерал программагъа кёре, жамауат аслам хайырланнган объектлени  игилендирирча битеуроссей  къол    кётюрюу баргъаны да сагъынылгъанды. Анга кёре,   Чегем  шахарда жашагъанла Бахсан шосседе Вороков бла  Мамбетов, Кяровада уа   Амбарный  бла  Лагерный орамла  арасында  объектле сайлагъанлары айтылгъанды.  Аны чеклеринде тротуарла жангыртыллыкъдыла, чыпынлы чыракъла салынныкъдыла, плиткадан жолчукъла жасаллыкъдыла, солуу зонала къураллыкъдыла эм тёгерек-башны  жашиллендирирча мадар этилликди.   

Тюбешиуде  жууукълаша келген  май байрамланы тийишли халда эм къоркъуусуз ётдюрюрча   иш къалай баргъанына да къаралгъанды.   Дагъыда кёп тюрлю соруула сюзюлгендиле.   Ала бла байламлы буйрукъла,  эсгертиуле да этилгендиле.