Черек райондан

                              Эсепле чыгъарылгъандыла

Бу кюнледе  Черек районну саулукъ сакълау  учреждениялары 2019-2021 жыллада  тамамлагъан ишлерини эсеплерин чыгъаргъандыла. Отчёт докладны  районну ара больницасыны баш врачы  Рахайланы Аслан  этгенди.   Жыйылыуну ишине  КъМР-ни саулукъ сакълау министрини орунбасары  Заурбек Батыров, районну администрациясыны башчысы  Къулбайланы Алан да къатышхандыла.

 Докладында Аслан Махмудович эллилени  саулукъларын игилендириуде эмда кючлендириуде тамамлагъан  ишлеринде кёрюмдюлеге , дагъыда  кадрла бла байламлы жанына  аслам эс бёлгенди.

  Энчи алып айтханда,  районну  саулукъ сакълауу стационар,  поликлиника бёлюмледен,  район больницадан, Огъары Малкъарда  участка больницадан, сегиз элли амбулаториядан эмда терк болушлукъ берген  бёлюмден къуралгъанды. Терк  медицина болушлукъ берген  бёлюмде  он  санитар машина барды. Арт заманлада  автопарк иги да жангыртылгъанды. Ол шарт а адамлагъа терк эмда тынгылы болушлукъ этерге онг бергенди. «Земский доктор» деген  федеральный программаны хайырындан  саулукъ сакълау учрежденияла кадрла бла жалчытылыннгандыла. 2020-2021 жыллада  ол программагъа тийишлиликде алты жаш врач  ишге алыннганды, бир къауум специалист бла жалчытылыннганды. Кадрла бла жалчытылыныу 2021 жылны ахырына  87,7 процентге жетгенди, анга да къарамай,  алыкъа да врачла,  педиатр, анестезиолог-реаниматолог, кардиолог, уролог  усталыкълары болгъанла  керекдиле.

 Районда сабий туууну юсюнден айтханда, ол  кёрюмдю иги да аз болгъанын  чертирге тийишлиди.

 Юч жылны ичинде  районда ауушханланы саны республикада ёлгенлени кёрюмдюсюнден кёп тюйюлдю. Жарсыугъа,  коронавирус аурууну хатасындан ёпкелеринден къыйналып ёлгенлени саны асламыракъ болгъанды.

Доклакда эм магъаналы  дагъыда  бир зат кётюрюлгенди, ол да  эллилени флюорография бла байламлы тинтиудю. Бусагъатда КОВИД-19 ауруу селейгени бла ол кемчиликни  тюзетир акъылдабыз.

Отчёт кезиуню ичинде онкология ауруудан къыйналгъанланы саны ёсген угъай  да,  азайгъанды. Андан ёлгенлени саны да алайды.

Юсюбюздеги жылгъа планланы юсюнден айтханда, «Демография» эмда «Саулукъ сакълау» деген миллет регион  проектлени жашауда бардырыу    баш магъаналыдыла. Сёзсюз, профилактика иш бардырыллыкъды. Алай бла  диспансеризацияны хайырындан онкология, башха къыйын аурууланы заманында ачыкълап, багъаргъа боллукъду.  Районда жашагъанланы жюз процентине толу  диспансеризация   этилликди.

   Докладны эсеплерине кёре, сюзюу да болгъанды.  Чыгъып сёлешгенле айтханнга кёре,  саулукъ сакълау системагъа жаш  специалистлени аслам къатышдырыргъа, багъыу учреждениялада туруп, саулукъларына бакъдыргъанлагъа  болумну бютюн иги этиуню,  битеулю диспансеризация, ол санда сабийлени араларында диспансеризацияны да  амалларын тапландырыу ишле тамамланылыргъа кереклисин да айтхандыла.  Ала бары да  эллиле саулукълу жашау  бардырыр ючюн этилген амалладыла.

                        Сабий садха къарагъанды

Бу кюнледе районну жер-жерли администрациясыны башчысы Къулбайланы Алан, аны орунбасары Тереза Эфендиева, билим бериу бёлюмню начальнигини къуллугъун толтургъан  Бёзюланы Ахмат, мектепни директору  Уяналаны Мурат да  Къашхатау элде «Радуга» сабий садха баргъандыла. Ала  1966 жылда ишленнген мекямны болумун тинтгендиле.

    Хар затха да къарап чыкъгъандан сора, Алан Борисович  сабий садда ишлегенле бла тюбешип, ала мекямны ичин, тышын да тап халда тутханлары ючюн ыспас этгенди эмда мекямгъа капитал ремонт этерге неда  жангы  сабий сад  ишлерге  кереклисин  чертгенди.  Аны юсюнден тынгылы билдириу, экспертле чыгъаргъан оноугъа кёре  этилликди, деп билдиргенди  Черек  район администрацияны пресс-службасыны башчысы Бёзюланы Залина.

                           Китапха сюймеклик ёседи

Къашхатау элдеги Маданият юйню  китапханасында «Китапны кюню» белгиленнгенди.   Байрамны   къууанчлы халда  ача, ары келген къонакъланы эмда анга къатышханланы  аллында,  байрамны къурагъан  район библиотеканы  тамата ишчиси Мокъаланы Аминат алгъышлагъанды. Ол ёсюп келген тёлюге китап окъургъа сюймекликлери бютюн терен болурун тежегенди.  «Китапла бизни гитче заманыбыздан башлап, жашауубузну ахырына дери да биргебизге болургъа керекдиле. Аланы хайырындан биз кёп затны юсюнден   билебиз, ала бизге чынтты адамла болургъа юйретедиле»,-дегенди ол.

 Андан сора китапны сюйгенле эки командагъа юлешиннгендиле: «Жилтинчиклеге» эмда  «Кёпню билгенлеге». Ала  белгили жазыучу Корней Чуковскийни  жомакъларына кёре конкурсха  къатышхандыла. Бек жарыкъ борчладан бири уа юйге берилген иш эди. Окъуучула  театр оюн кёргюзтгендиле. Китапны туугъан кюню сейирлик жарыкъ эмда эсде къалырча болгъанды. Байрамны ахырында уа эки команда да бирча хорлап, дипломла , татлы затла эмда саугъала къоллу болгъандыла.