Жемишле чыгъарыу жаны бла алчыланы санында

Бизни республика жемишле эмда наныкъла бла кесин 42, 9 процентге жалчытады. Былтыр регионда быллай продукциядан 535,5 минг тонна чыгъарылгъанды, дегендиле КъМР-ни Эл мюлк министерствосунда.

Импортну алышындырыу программаны чеклеринде бирси регионлагъа республика 400 минг тоннадан аслам продукция жиберирге боллукъду. «Муну аллында кийирилген чеклениулени кезиуюнден башлап аграрийле ишни андан ары айныта барадыла. Къабарты-Малкъарда ёсдюрюлген жемишлени бла наныкъланы кёп регионлада табаргъа боллукъду. Бизни продукциябыз игиди, конкуренциягъа чыдамлыды. Алыучуланы аны бла жылны кезиуюне да къарамай жалчытып турурча бузмай тутхан объектле ишлейбиз. Бюгюнлюкде аланы барына да 186 минг тонна сыйынады», - дегенди министр Хасан Сижажев.

Наныкъ эмда терек бахчаланы къурау жаны бла республика алчы беш регионну санына киреди. Сёз ючюн, аллай мюлклени ёлчеми былтыр 1,5 минг гектаргъа кёбейгенди. Сижажев айтханнга кёре, бу иш андан да ары бардырлыкъды, сагъынылгъан объектлени санына да къошуллукъду.