Дарманла бла жалчытыуда чурум жокъду

РФ-ни Саулукъ сакълау министерствосунда эм Росздравнадзорда айтханларына кёре, бизни къыралда дарманла бла жалчытыугъа тынгылы контроль этиледи, къытлыкъ болур деген къоркъуу жокъду, багъала да терк кётюрюллюк тюйюлдюле. Регионлада больницалада бла поликлиникалада уа къыстырыкъ этиледи.

Экспертле оюм этгенлерича, сатыуда болгъан дарманланы 60 проценти, жашау этерча изленнгенлени тёртден биринден къалгъаны да бизни къыралда чыгъарыладыла. Сёз ючюн, гормон препаратла, диабетиклеге керекли дарманла да алгъынча келедиле. Тыш къыралладан предприятияла аланы чыгъарыуну эмда ташыуну тыймагъандыла. «Россейде рынокдан бир фармацевтика компания окъуна кетеме дегенин энтта да эшитмегенме. Биз кёп къыраллада ишлейбиз, РФ-де производствону жабаргъа умутубуз жокъду», - дегенди Япониядан «Астеллас» компанияны Россейде бёлюмюню башчысы Виктор Феркович.

Алай гузабалыкъ шошаймайды, адамла  дарманланы къазауатдан  сатып аладыла. Экспертле уа производствола жабыллыкъ тюйюлдюле, тышындан ташыу да алгъынча барлыкъды, дейдиле.

- Адамла алай этгенлери сейир тюйюлдю – ала дармансыз къалып къалыргъа къоркъадыла, - дегенди «Россейни газетине» Аптекачыланы  гильдиясыны башчысы Елена Неволина. – Арсарсыз айтырыгъым а алайды: компанияла багъаланы кётюрмегендиле. Препаратла аптекалагъа алгъын этилген келишимлеге кёре ташыладыла. Аны себепли аланы багъалары тюрленмей келеди.

Къабарты-Малкъарда да аладан къытлыкъ жокъду. Аптекаланы къауумуну  башчысы Динара Кешева билдиргенича: «дарманла кюн сайын келедиле, бизде, тыш къыраллада чыкъгъанлары да бардыла. Бир препарат болмаса, анга ушашлы аллайын табарыкъбыз, не тюрлю сурамны да жалчытырыкъбыз».

Медицина оборудование чыгъарыу бла кюрешген тыш къыраллы предприятияла кеслерини продукцияларын Россейге мындан арысында да сатып турургъа сюйгенлерин, производстволаны мында да ачаргъа умут этгенлерин билдиредиле. RP Canon Medical Systems (Япония) компанияны башчысы Денис Чередниченко. «Бир проектибизни да тыймагъанбыз, оборудование ташыйбыз, орнатабыз, техника жумушларына къарайбыз, врачланы алада ишлерге юйретебиз. Шёндюгю чурумланы хатасындан логистиканы аз-маз тюрлендирирге, проектлени болжалларын да созаргъа тюшгенди. Алай дагъыда биз келишимледе жазылгъандан чыкъмазгъа, багъыу учрежденияла бла ишибизни тынгылы бардырыргъа таукелбиз. Алгъаракъда Россейде медицина диагностика оборудование чыгъаргъан завод ишлеп башлагъан эдик да, аны да эбине жетдирликбиз», - дегенди.