Аш-азыкъны кёп тюрлюлери бла кеси кесибизни жалчытабыз

Кёп болмай РФ-ни Эл мюлк министерствосунда болгъан жыйылыуда  Россейни Президентини «Россей Федерацияны  аш-азыкъ къоркъуусузлугъун жалчытыр ючюн  экономика жаны бла энчи амалланы хайырланыуну юсюнден»  буйругъу къалай толтурулгъанына къаралгъанды. Кенгеш видеоконференция халда  ётгенди, деп билдиргендиле КъМР-ни Эл мюлк министерствосуну пресс-службасындан.
Россейни Эл мюлк министри Дмитрий  Патрушев айтханнга кёре, озгъан алты жылгъа къыралда аш-азыкъны  импорту юч кереге азайгъанды. Сёз ючюн, 2013 жылда аны багъасы 43,3 миллиард долларгъа жетген эсе, былтыр а ол 30 миллиард долларгъа дери тюшгенди.  
Арт заманлада къыралдан иги кесек болушлукъ этилгенини хайырындан саулай битимчилик бёлюмде къууандырырча  ёсюм эсленеди, ол санда Къабарты-Малкъарда да. Ол а импортну алышындырыуда уллу магъананы тутады.  КъМР-ни  эл мюлк министри Хасан Сижажев билдиргеннге кёре, бюгюнлюкде республика жемиш, тахта кёгет, эт, сют эм жумуртха дегенча продукцияла бла кесин толусунлай жалчытырчады.
- 2013-2019 жыллада эл мюлк продукция 65 процентге кёбейип, 32,7 миллиард сомдан 54,1 миллиард сомгъа жетгенди. Ол санда жемишледен  бла  наныкъладан юч кереге кёп алыннганды. Сёз ючюн, жети жылны ичинде республикада 13 минг гектарда терк айныгъан терек бахчала  къуралгъандыла. Бу жаны бла  регион алчы жерни окъуна алады, -деп къошханды Хасан Лабидович.
Болсада бай тирликни тийишли халда  сакълар ючюн  энчи жерле  керекдиле. Ол жаны бла да Къабарты-Малкъар бирсиледен жетишимлиди. Бюгюнлюкде республикада жемишледен бла тахта кёгетледен 210 минг тонна асырарча   31 объект ишленнгенди. Быйыл жылны ахырына энтта да 35 минг тоннагъа  сегиз комплекс хайырланыргъа берилликди.