Яслилени санына къошула барады

«Демография» деген Миллет проектни чеклеринде бизни республикада талай районлада жангы ясли блокланы къурулушу барады. Бу кюнледе энтта да ючюсюнде ишле къыстау бардырыладыла, деп билдиргендиле КъМР-ни Къурулуш эмда жашау журт - коммунал мюлк министерствосундан.

Биринчи объект Чегем шахардады. Ведомствода айтханларыча, ол бир къатлыды, кеси да беш блокдан къураллыкъды. Хазыр болса, анда бир кезиуге 140 сабий кечинирикди.

Шёндюге дери бу объектде электромонтаж ишле тамам этилгендиле, эшикле бла терезеле да орнатылгъандыла. Къурулушчула отоу тюплеге бетон къуюп, къабыргъаланы да сюртюп бошагъандыла. Дагъыда канализация эмда жылыу сетьлени жарашдыргъандыла, модуль котельняны бла трансформатор подстанцияны да орнатхандыла. Энди уа къабыргъаланы тышын жылыуну тыйгъан материалла бла тышлау, отоулада да сюртюу-бояу ишле барадыла.

Объектде 26 адам ишлейди эмда эки машина хайырланылады. Аны хазырлылыгъы 60 процентди, дейдиле министерствода, кеси да быйыл битерикди деп ышандырадыла.

Дагъыда Терс-Къолда эмда Куба элде энтта да биришер яслини къурулушу барады. Ала экиси да биринчисинден гитчерек боллукъдула. Битселе, хар бирине да, экишер къауумгъа бёлюнюп, 40 сабий жюрюрюкдю. Подряд организацияланы ишчилери бу объектлени фундаментлерин орнатып, къабыргъаларын къалап, башларын да жабып бошагъандыла. Сантехника жумушланы тындыргъандыла, энди уа сюртюу-бояу ишле бла кюрешедиле. Бу яслилени да быйылны ахырына дери хайырланыргъа берирге дейдиле.