Шимал Кавказда энергосистеманы бирикдириу башланнганды

«Россети» компанияны башчысыны орунбасары Виталий Иванов бу кюнледе Пятигорск шахарда кенгеш бардыргъанды. Анда Шимал Кавказны электроэнергетика комплексин айнытыуну, аны бла байламлы борчланы тамамлауну юсюнден сёлешиннгенди.

Баш тема уа, ол айтханнга кёре, иесиз болгъан эмда жумушларына муниципалитетле къарагъан сетевой объектлени компанияны бойсунуууна кёчюрюудю. Жер-жерледе сетевой организацияла тапсыз ишлегенлерини юсюнден РФ-ни Президенти сагъыннгандан сора, къыралны Правительствосу ол борчну тамамларгъа кереклисин туура этгенди. «Регионланы Башчыларына да ол объектлени узакъ болжалгъа салмай компаниягъа кёчюрюрге буйрукъ берилгенди. Нек десенг, ток бла ышаннгылы жалчытыу ишни чурумсуз жаланда бир холдинг тындырыргъа боллукъду», - дегенди ол.

Виталий Иванов айтханнга кёре, шёндю хапар Махачкъаланы, Нальчикни эмда Владикавказны сетьлерин «Россетиге» кёчюрюуню юсюнден барады. Энергетикле мында хазна чурум чыкъмаз деп ышанадыла. Иш эбине жетгенден сора уа компания саулай СКФО-да энергетика комплексни жангыртыугъа 60 миллиард сом къоратыр умутлуду. «Жаланда бу кварталда беш миллиард сом багъасына мадар этилликди. Бюгюнлюкде быллай магъаналы проект бирси округланы биринде да жокъду», - деп чертгенди Иванов.

Жыйылыуда республикаланы ток ючюн борчларыны юсюнден да сёлешиннгенди. «Саулай айтханда, бюгюнлюкге аланы ёлчеми 50 миллиард сом чакълыды. Аны хатасындан хайырланыучуланы электрокюч бла ышаннгылы жалчытхан къыйынды. Бизни компания мында да амал табаргъа кюрешеди. Ол борчланы кезиу-кезиу жаба барыргъа болурча деп, шёндюледе электрокюч чыгъарыучула эмда «рынокну Совети» бла оноулашыу барады», - дегенди спикер.

Тюбешиуде дагъыда энергетиклени араларында юйретиуле бардырыуну, «Цифровая трансформация – 2030» концепцияны чеклеринде компания къаллай проектле тамамларгъа умут этгенини, жер-жерледе бёлюмледе болгъан проблемаланы  юслеринден да баргъанды ушакъ. Ахырында Виталий Иванов Шимал Кавказны энергосистемасында чынтты профессионалла ишлегенлерин, ала бла не тюрлю борчну да тындырыргъа къолдан келлигин чертгенди.