Ишлене тургъан юйде фатарны къоркъмай сатып алыргъа боллукъду

Бу айны биринчисинде Россейде долевой къурулушда жангы жорукъ сингдирилгенди. Анга кёре энди бу ишде эскроу-счётла хайырланыллыкъдыла борчлу халда, дейдиле КъМР-ни Экономиканы айнытыу министерствосунда.Алай бла энди, кёп фатарлы юй сюерге умут этген компания, къурулушну алгъадача адамладан ахча жыйып бардыраллыкъ тюйюлдю. Ол анда жаланда кесини финансларын неда банкдан алыннган кредитни хайырланыргъа боллукъду.  Юй ишленнгинчи анда фатар алыргъа сюйгенле уа ахчаны энчи – «эскроу» деген счётха кёчюрюрге керек боллукъдула.

Башхача айтханда, шёндюге дери къурулушчула ишни халкъдан ахча жыйып алай бардырыучу эдиле. Бирде, аны эбине жетдирмей, жыйылгъан средстволаны да къымып кетгенле да болгъандыла. Энди уа алай этер амал боллукъ тюйюлдю. Юй битип, адам да фатар къоллу болса, ахча ол компаниягъа жаланда ма андан сора берилликди. Ары дери уа анга бир жан да тиерик тюйюлдю.

- Алгъада, долевой къурулушха къатышхан адам фатарны ачхычын алса окъуна бирде жашау журтха иелигини регистрациясын эталмай энтта да бир талай заманны ары-бери чабып туруучу эди. Ол а кадастр учёт тюрлю-тюрлю сылтаула бла заманында этилмегени сылтауундан, - дейди Росреестрни Федерал кадастр палатасыны эксперти Надежда Лещенко.
Объектни хайырланыргъа эркинлик берген власть орган кёп фатарлы юйню быллай учётха салыуну къайгъысын этерге борчлуду. Аны кесин да беш кюнню ичинде. Документле жыйылып, кадастр палатагъа жиберилселе, аны специалистлери ол юйню юсюнден толу информацияны ЕГРН-ге тюшюредиле. Техника планда халатла табылсала, аланы кетериуге юч ай бериледи.

Алгъыннгы законнга тийишлиликде юйню ишлеген компания аны кадастр учётха салыу бла кюрешмегенди; аны борчлары бериу-алыу актха къол салыннганы бла бошала эдиле. Энди уа анга бу иш не къадар терк тындырылса иги боллукъду. Ансыз сагъынылгъан счётлада жыйылгъан ахча бериллик тюйюлдю.

Фатар къоллу болгъан адам иеликге регистрацияны этер ючюн, документлени МФЦ-гъа элтип неда Росреестрни сайтында эмда къырал жумушланы тамамлау порталда берирге эркинди. Бир ыйыкъдан кеч къалмай ол анга толу ие боллукъду. «Къаллай документле бериллиги жашау журт не халда сатылып алыннганына кёре болады. Сёз ючюн, анда кредит неда ипотека хайырланылгъанмыды, иелени арасында акъылбалыкъ болмагъанла бармыдыла. Къагъытла бла бирге бериу-алыу акт эмда долевой къурулушну юсюнден келишим да жиберилирге керекди», - дегенди Надежда Лещенко.

РФ-ни Правительствосуну быйыл 22 апрельден 480 номерли бегимине тийишлиликде адамладан ахча жыярча къурулуш компания юйню эм азындан 30 процентин битдирирге керекди. Аны бла бирге анда отоуланы эмда жерлени (ол санда машинала салыучу) эм азындан ондан бири эскроу-счётдан башха амал бла сатылыргъа керекдиле.
- Законда айтылгъаннга кёре, быллай бизнес бла кюрешгенлени абызыратмазча, шёндюге дери бир кесеги тындырылгъан проектледе долевой къурулушха келишимни быллай счётсуз да этерге боллукъду, - деп къошханды эксперт.