Чыгъармачылыкъ бла кюрешгенлени бирикдирирге алланып

- Быйыл апрель айда  -Къабарты-Малкъарда   музыкантланы, художниклени, дизайнерлени эм къол усталаны бирикдирген   Арт-ара ишлерикди.  Ол Нальчикни эски районунда Къабарты орамны баш жанында - ачыллыкъды,-  дейди «Арт-зал «Платформа» шахарны айнытыу институтну таматасы Оксана Шухостанова.                                                       

Ол  айтханнга кёре, араны ачылыууна былтырдан бери хазырланнгандыла. Аны бла байламлы мекямны 500 квадрат метрлик  арбазын  айбатландырырча да иги кесек иш этилгенди.  Мындан арысында  «Периметр» ара   шахарчыла жыйылыргъа сюйген – лекцияла, тюбешиуле,  кинопоказла, вернисажла концертле эм башха акцияла ётдюрюлген жер боллукъду.  

Аны ачылыуу бла байламлы къууанч жыйылыугъа назмучула, артистле,  къол устала  эм башхала  къатышырыкъдыла. Ол кюн къонакъланы тюрлю-тюрлю   чайла  эм татлы ашарыкъла бла сыйларыкъдыла.   

Бюгюнлюкде окъуна  чыгъармачылыкъ бёлюмню келечилери  тюбешиулеге, кёрмючлеге,  вернисажлагъа, мастер-класслагъа эм  лекциялагъа къатышырча программаларын хазыр этерге боллукъдула. 

 Эсге сала айтсакъ, «Арт-резиденция «Периметр» проектни «Эко-Нальчик» бла «Платформа»   шахарны айнытыу институт къурагъандыла. Аны бардырыргъа  туризм жаны бла федерал агентстводан  2,1 миллион сом грант берилгенди.  Ызы бла  жууукъ заманда арт- объектде  турист-информация ара ишлерикди.